“Paxtakor” futbol klubiga portugaliyalik mutaxassis Pedro Moreyra murabbiy etib tayinlandi. Bu haqda 4-dekabr kuni klubning kelajakdagi rejalariga bag‘ishlangan matbuot anjumanida ma’lum qilindi.

Yangi bosh murabbiy bilan shartnoma “1+1” sxemasi bo‘yicha bilan tuzilgan. Pedro Moreyraga to‘rtta assistent yordam beradi.

Matbuot anjumanida jamoa prezidenti Jahongir Ortiqxo‘jayev 2022-yilning iyun oyidan buyon jamoani boshqarib kelayotgan Maksim Shatskix lavozimidan ozod etilgani va endi klub raisining maslahatchisi sifatida ishlashini aytib o‘tdi.

“Biz Maksim Shatskixga minnatdorchilik bildiramiz. Shatskix klubdan ketmadi, bu iste’fo emas. U bosh murabbiy lavozimidan ketdi, lekin direktorlar kengashida mening maslahatchim bo‘lib qolmoqda”, — dedi jamoa prezidenti.

Yangi murabbiy oldiga chempionlik vazifasi qo‘yilgan. Mutaxassisning shartnomasida maoshini oshkor qilishni taqiqlovchi band ko‘rsatilgan.

“U qanday bo‘lishidan qat’i nazar, halol ishlashi kerak. Uning ishiga hech kim aralashmasligi kerak. Biz uni o‘zbeklashtirib, bir haftadan keyin choyxonadan chiqolmaydigan qilib qo‘ymasligimiz kerak”, — dedi Ortiqxo‘jayev.

• Ortiqxo‘jayev
• Paxtakor
• murabbiy