Toshkent va Parij O‘zbekiston-Fransiya qo‘shma universitetini tashkil etish hamda Samarqand shahrida “Fransiya alyansi” faoliyatini yo‘lga qo‘yish masalalarini muhokama qilmoqda. Bu haqda “Dunyo” axborot agentligi xabar berdi.

Qayd etilishicha, Yevropa mamlakatlari va Yevropa Ittifoqi institutlari bilan hamkorlik boshqarmasi rahbari Oybek Shaxavdinov Fransiya Tashqi ishlar vazirligining Kontinental Yevropa departamenti direktorining o‘rinbosari Silven Giyoge bilan videomuloqot qilib, muzokaralar o‘tkazgan.

Uchrashuv chog‘ida Fransiyaga oliy darajadagi tashrif yakunlari bo‘yicha erishilgan barcha kelishuvlar, jumladan, savdo-iqtisodiy va sarmoyaviy sohalardagi kelishuvlarni o‘z vaqtida amalga oshirish masalalari muhokama qilingan.

Tomonlar joriy yil aprel oyida tashqi savdo, iqtisodiy jozibadorlik va xorijdagi Fransiya fuqarolari vazirining O‘zbekistonga tashrifini, shuningdek, savdo-iqtisodiy masalalar bo‘yicha O‘zbekiston-Fransiya hukumatlararo komissiyasining 9-yig‘ilishini, shuningdek, Fransiyaning “Medef” korxonasi ishtirokida ikki tomonlama uchrashuvlar o‘tkazishga qaror qilingan.

Ta’lim sohasida, xususan, O‘zbekiston-Fransiya qo‘shma universitetini tashkil etish hamda Samarqand shahrida “Fransiya alyansi” faoliyatini yo‘lga qo‘yishga ham alohida e’tibor qaratilgan.

Onlayn uchrashuvda O‘zbekistonning Fransiya va Portugaliyadagi elchisi Sardor Rustamboyev va Fransiyaning O‘zbekistondagi elchisi Oreliya Bushez ham ishtirok etgan.

• Fransiya
• O‘zbekiston
• Universitet