“O‘zgidromet” ijtimoiy tarmoqlarda Eron hududida go‘yoki “kislotali bulutlar” shakllanib, ular yog‘inlar bilan Markaziy Osiyo davlatlariga yetib kelishi mumkinligi haqidagi xabarlar ilmiy jihatdan asoslanmaganini ma’lum qildi.

Qayd etilishicha, kislotali yog‘inlar atmosferada oltingugurt oksidlari (SO₂) va azot oksidlari (NO₂) uzoq vaqt davomida to‘planib, bulutlarda suv bug‘i bilan kimyoviy reaksiyaga kirishishi natijasida yuzaga keladi. Bunday jarayonlar asosan yirik sanoat hududlari va to‘g‘ridan-to‘g‘ri chiqindi manbalari yaqinida kuzatiladi.

Mutaxassislar ta’kidlashicha, havo massalari uzoq masofalarga ko‘chishi jarayonida ifloslantiruvchi moddalar miqdori atmosferadagi turbulentlik, vertikal aralashish hamda quruq va nam cho‘kish jarayonlari ta’sirida keskin kamayadi. Shu sababli manbadan minglab kilometr uzoqlikda xavfli darajadagi kislotali yog‘inlarning shakllanishi deyarli imkonsiz.

Shuningdek, yog‘inlar asosan hudud ustidagi atmosferada mavjud suv bug‘i va aerozollar hisobiga, mahalliy bulut hosil bo‘lish jarayonlari natijasida yuzaga kelishi qayd etildi.

Meteorologik kuzatuvlar hamda atmosfera havosi sifati monitoringi ma’lumotlariga ko‘ra, kislotali bulutlarning O‘zbekiston va qo‘shni davlatlar hududiga ko‘chib kelishi xavfi kuzatilmayapti.

Mutasaddilar ommaviy axborot vositalari va ijtimoiy tarmoq foydalanuvchilarini tasdiqlanmagan ma’lumotlarni tarqatmaslikka hamda faqat rasmiy manbalarga tayanishga chaqirdi. Shuningdek, yolg‘on yoki tasdiqlanmagan axborotlarni tarqatish uchun amaldagi qonunchilikka muvofiq javobgarlik choralari mavjudligi eslatib o‘tildi.

• O‘zgidromet
• axborot
• yomg‘ir