O'zbekiston Malayziya sayyohlari uchun eng yaxshi yo'nalishlardan biriga aylanishi mumkin. Bu haqda O'zbekiston Respublikasi Turizm va madaniy meros vazirligi ma'lum qildi.

Turizm va madaniy meros vazirligi Buxoro viloyati Bosh boshqarmasi hamda Buxoro viloyati hokimligi rahbariyatidan iborat delegatsiya Malayziyaga tashrif buyurdi. Ushbu tashrif O‘zbekiston Respublikasi Prezidentining ziyorat turizmi va xalqaro aloqalarni rivojlantirish borasidagi topshiriqlariga binoan amalga oshirildi.

Tashrif doirasida O‘zbekistonning Malayziyadagi ziyorat turizmi elchisi, Malayziyaning Perlis shahri muftiysi Mohd Asriy bin Zaynul Abidin, Malayziya Islom sanʼati muzeyi rahbariyati, Kuala-Lumpur shahridagi “Imom Buxoriy” nomli jomeʼ masjidi rahbariyati, Kuala-Lumpur aeroporti rahbariyati va “Alfa group” boshqaruv rahbariyati, Malayziya turistik kompaniyalar assotsiatsiyasi — MАTTА rahbari bilan uchrashuvlar o‘tkazildi.

Mazkur uchrashuvlarda ikki mamlakat o‘rtasida ziyorat turizmini yanada rivojlantirish masalalari muhokama qilindi. Xususan, sayyohlar oqimini ko‘paytirish uchun mamlakatlar o‘rtasida muntazam to‘g‘ridan-to‘g‘ri havo qatnovini yo‘lga qo‘yish va narxlarni muqobillashtirish kerakligi alohida taʼkidlandi.

“Toshkent va Kuala-Lumpur o‘rtasida o‘zbek aviakompaniyalari reyslarining tez-tez yo‘lga qo‘yilishi, shubhasiz, davlatlar o‘rtasidagi turistik aloqalarning rivojlanishiga yordam beradi", – dedi Malayziyaning Perlis shahri muftiysi Mohd Asriy bin Zaynul Abidin.

Uchrashuv natijasida 2023–2024-yillarda Kuala-Lumpurdagi Islom sanʼati muzeyida “O‘zbekiston – Islom madaniyati markazi” mavzusida ekspozitsiyani tashkil etish (Turizm va madaniy meros vazirligi hamda Buxoro viloyati hokimligi bilan hamkorlikda), 2023–2024-o‘quv yilida Al-Buxoriy xalqaro universitetida bakalavriat yo‘nalishlari bo‘yicha tahsil olish uchun O‘zbekistonning kam taʼminlangan oilalaridan iqtidorli talabalarga taʼlim grantlari ajratish, Malayziyaning Kuala-Lumpur aeroporti va Buxoro xalqaro aeroporti o‘rtasidagi hamkorlik va boshqa muhim masalalar borasida kelishuvlarga erishildi. Bu kelishuvlarni yanada mustahkamlash uchun esa malayziyalik turizm sektori vakillari joriy yilning 1–7-noyabr kunlari Samarqand, Buxoro, Toshkent va Xivada bo‘lib o‘tadigan "Ziyorat turizmi" forumi hamda 30-noyabr – 1-dekabr kunlari Toshkentda o‘tkaziladigan Xalqaro turizm yarmarkasiga taklif etildi.

Malayziyadagi butunjahon so‘fiylar markazi rahbari Said Аbdul Karim Kuala-Lumpur, Jakarta, Dakka, Karachi, Dehli shaharlaridan Buxoroga to‘g‘ridan-to‘g‘ri aviaqatnovlar yo‘lga qo‘yilgan taqdirda, har yili minglab sayyohlarning O‘zbekistonga sayohatlarini tashkil etish imkoniyati mavjudligini bildirdi.

Kuala-Lumpurdagi muzokaralar natijasida shuningdek, 2023-yil bahor oylarida Buxoroda «Naqshbandiya» festivalini o‘tkazishga kelishib olindi.

Bundan tashqari, malayziyalik ziyoratchilarning "Umra+" dasturi orqali Buxoroga sayohatlarini tashkil etish bo‘yicha charter reyslarni amalga oshirishga doir takliflar ilgari surildi.

• Malayziya
• Turizm