O‘zbekiston milliy terma jamoasi bosh murabbiyi Srechko Katanes sog‘lig‘i bilan bog‘liq muammolar sababli O‘zbekiston futbol assotsiatsiyasi bilan tuzilgan shartnomani o‘zaro rozilik bilan bekor qilishga qaror qildi. Sloveniyalik murabbiy o‘z murojaatida hozirgi holatida vazifalarini to‘laqonli, professional tarzda bajara olmasligini afsus bilan qayd etgan. Doimiy qo‘llab-quvvatlagani va samarali hamkorlik uchun assotsiatsiyaga o‘z minnatdorchiligini bildirgan. Terma jamoaga Jahon chempionati saralash bahslarida omad tilagan.

O‘z navbatida, O‘zbekiston futbol assotsiatsiyasi Srechko Katanesga O‘zbekiston terma jamoasi boshqaruvidagi mehnatlarini uchun minnatdorchilik bildirgan. Unga salomatligini tiklab, murabbiylik faoliyatini muvaffaqiyatli davom ettirishini tilagan.

“O‘FA hamda Srechko Katanes o‘rtasidagi shartnoma o‘zaro do‘stona munosabatlarni saqlagan holda bekor qilindi. O‘zbekiston futbol assotsiatsiyasi milliy terma jamoamiz bosh murabbiyi lavozimiga munosib nomzod tayinlash borasida ish olib bormoqda”, – deb yozmoqda O‘zbekiston Futbol Assotsiatsiyasi matbuot xizmati.

• Iste'fo
• UFA
• murabbiy