Osiyo taraqqiyot banki va “Indorama Agro” MCHJ xorijiy korxonasi O‘zbekiston uchun 15 mln AQSH dollarlik qarz kelishuvi imzoladi. Qayd etilishicha, ushbu mablag' O'zbekistonda fermerlarining daromad manbalarini yaxshilash, ularning iqlim o‘zgarishiga chidamliligini oshirish va COVID-19 pandemiyasidan so‘ng davom etayotgan tiklanishni qo‘llab-quvvatlash uchun ajratiladi.

Shuningdek, qarz paxta va bug‘doy yetishtiruvchi fermerlarga avanslarni moliyalashtirish, 3600 dan ortiq fermer va qishloq xo‘jaligi ishchilari manfaati uchun, shuningdek, ularning iqlim o‘zgarishiga chidamliligini oshirish va barqaror qishloq xo‘jaligi amaliyotini ilgari surish uchun bevosita agrotexnik yordam ko‘rsatishga yo‘naltiriladi.

Moliyalashtirish barqaror rivojlanishga bog‘liq qarz (BRBQ) sifatida tuzilgan va unda fermerlarni "Better Cotton Initiative" (BCI) tamoyillariga o‘rgatish va zararkunandalarga qarshi kurashishning kompleks amaliyotni takomillashtirish bilan bog‘liq samaradorlikning muhim ko‘rsatkichlari nazarda tutilgan. BCI tamoyillari agrokimyoviy moddalarga qaramlikni kamaytirish, suv resurslarini va yer resurslarini samarali boshqarish va bioxilma-xillikni ta’minlash maqsadida zararkunandalarga qarshi kurashishning biologik vositalarini afzal ko‘rishni, shuningdek xalqaro mehnat, gender va ijtimoiy himoya standartlarini ilgari surishni o‘z ichiga oladi. Barcha BRBQ maqsadlarini mustaqil tomon baholaydi.

O‘zbekistonning qishloq xo‘jaligida qariyb 3,7 million kishi ish bilan ta’minlangan bo‘lib, u mamlakatdagi eng yirik ish o‘rinlar manbai hisoblanadi. Bunda paxta va bug‘doy yetakchi o‘rinni egallaydi. 2021-yilda qariyb 580 ming tonna paxta yetishtirilib, O‘zbekiston jahonda sakkizinchi o‘rinni egalladi

OTB uchun oziq-ovqat xavfsizligi ustuvor masala bo‘lib hisoblanadi. Mintaqadagi fermerlar va agrobiznesni to‘g‘ridan-to‘g‘ri qo‘llab-quvvatlash ushbu tashabbusning asosiy jihati. Bunda xususiy sektorga OTB tomonidan 3,5 milliard AQSH dollari va birgalikda moliyashtirish shaklida 5 milliard AQSH dollari taqdim etilishi kutilmoqda. 

"Indorama Corporation" Singapurda joylashgan Osiyodagi yetakchi kimyoviy xoldinglardan biridir. "Indorama Corporation"ning to‘qqiz mamlakatda azotli o‘g‘itlar, fosforli o‘g‘itlar, poliyetilen, polipropilen, poliyester, to‘qimachilik, paxta tolasi va tibbiy qo‘lqoplar kabi turli xil mahsulotlar ishlab chiqaradigan 31 dan ortiq ishlab chiqarish maydonlari mavjud. 

Indorama - Sahroi Kabirdan janubda joylashgan Afrika mamlakatlaridagi eng yirik o‘g‘it ishlab chiqaruvchi, Gʻarbiy Afrikadagi eng yirik poliolefin ishlab chiqaruvchi va dunyodagi uchinchi yirik sintetik qo‘lqop ishlab chiqaruvchisidir. Bundan tashqari Indorama paxta va sintetik iplarning integrasiyalashgan ishlab chiqaruvchisi bo‘lib hisoblanadi. "Indorama Corporation"da butun dunyo bo‘ylab 22 000 dan ortiq kishi ishlaydi.

• Osiyo taraqqiyot banki
• Tashqi qarz