“O‘zbekiston sentyabr oyida dunyoda oltin sotgan yagona davlat bo‘ldi”, – deb xabar berdi World Gold Council.

Xalqaro valyuta jamg‘armasi va ochiq manbalardagi ma’lumotlarga ko‘ra, Markaziy banklar 2025-yil sentyabr oyida rasman 39 tonnaga yaqin oltin sotib oldi. Bu avgust oyiga nisbatan qariyb 79 foizga ko‘p va so‘nggi 12 oydagi o‘rtacha ko‘rsatkichdan yuqori – 27 tonna atrofida.

2025-yil uchinchi choragida jami sof xaridlar taxminan 220 tonnani tashkil etdi, bu ikkinchi chorakka nisbatan 28 foizga yuqori va so‘nggi besh yildagi o‘rtacha ko‘rsatkichdan 6 foizga ko‘p.

Eng yirik xaridor — Braziliya Markaziy banki bo‘lib, 15 tonna oltin sotib olgan. Uchlikka Qozog‘iston (8 tonna) va Gvatemala (5 tonna) regulyatorlari ham kirgan. Rossiya, Turkiya, Chexiya, Xitoy va Gana ham nisbatan kichik hajmlarda xarid amalga oshirgan.

Yagona oltin sotuvchisi O‘zbekiston Markaziy banki bo‘lib, 4 tonna oltin sotgan. Yillik kesimda respublika 21 tonna bilan dunyodagi eng yirik oltin sotuvchisi maqomini saqlab qolib, Singapur va Rossiyani ortda qoldirmoqda.

• Oltin
• O‘zbekiston
• savdo