Qatar futbol assotsiatsiyasi AQSh va Isroilning Eronga bergan zarbalari hamda mintaqaga javoban uchirilgan raketalar ortidan mamlakatdagi barcha turnir va uchrashuvlarni noma’lum muddatga to‘xtatdi. Shu sabab Dohada o‘tkazilishi rejalashtirilgan Ispaniya va Argentina o‘rtasidagi Finalissima bahsi ham so‘roq ostida qoldi. Bu haqda ESPN nashri xabar berdi.

Yevropa chempioni Ispaniya hamda Amerika Kubogi g‘olibi Argentina o‘rtasidagi uchrashuv joriy yilning 27 mart kuni Dohadagi “Lusail” stadionida o‘tkazilishi rejalashtirilgan. Unda Lamin Yamal va Lionel Messi kabi yulduzlar maydonga tushishi kutilayotgandi.

 “Qatar futbol assotsiatsiyasi bugundan boshlab barcha turnirlar, musobaqalar va o‘yinlar keyingi noma’lum muddatga qoldirilganini e’lon qiladi. Musobaqalarning qayta boshlanish sanalari rasmiy kanallar orqali ma’lum qilinadi”, – deyiladi Qatar futbol assotsiatsiyasi rasmiy bayonotida.

Finalissima uchrashuvini o‘tkazish yoki keyinga surish bo‘yicha yakuniy qaror tashkilotchilar UEFA va KONMEBOL vakolatiga kiradi.

Shuningdek, Bahrayn ham barcha futbol o‘yinlarni to‘xtatganini ma’lum qildi. Osiyo futbol konfederatsiyasi esa mintaqadagi Chempionlar ligasi Elit bosqichi o‘yinlari keyinga qoldirilganini e’lon qildi. Hozir chorak final bosqichiga yetib kelgan Osiyo Chempionlar ligasi hamda Chellenj ligasi bahslariga ham ushbu vaziyat ta’sir ko‘rsatmoqda.

• AQSh
• Eron
• Futbol
• Isroil
• Urush