Tovar-moddiy boyliklarning mamlakat hududidan noqonuniy olib chiqilishiga qarshi kurashish yo‘nalishida Davlat xavfsizlik xizmatining Andijon viloyati bo‘yicha boshqarmasi va Bojxona idoralari xodimlari hamkorligida tezkor tadbir o‘tkazildi. Bu haqda DXX matbuot xizmati xabar berdi.

Jumladan, Baliqchi tumanida yashovchi, 1985-yilda tug‘ilgan ayol va uning 2006-yilda tug‘ilgan qizi umumiy bahosi 819 mln so‘mni tashkil etuvchi, 7 dona nostandart shakldagi, jami 473 gr oltin quymalarni kiyimlari ostiga yashirgan holda Xo‘jaobod tumanidagi “Do‘stlik” chegara bojxona posti orqali Qirg‘iz Respublikasiga olib o‘tmoqchi bo‘lgan vaqtlarida to‘xtatib qolingan.

Hozirda qonunbuzarlarga nisbatan Jinoyat Kodeksining 182-moddasi (bojxona to‘g‘risidagi qonunchilikni buzish) 2-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.

• Chegara
• DXX
• Oltin
• Qirg‘iziston
• Qoidabuzarlik