O‘zbekiston va Italiya “The Samarkand express” sayyohlik poyezdini yo‘lga qo‘yadi. Bu haqda O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi huzuridagi Turizm qo‘mitasi xabar berdi.

Ushbu turistik poyezd loyihasi boʻyicha Toshkent xalqaro investitsiya forumi doirasida “Oʻzbekiston temir yoʻllari” AJ va Italiyaning “Arsenale Group” kompaniyasi oʻrtasida hujjat imzolangan.

“Boy tarixiy meros va tabiiy go‘zallikka ega bo‘lgan O‘zbekiston o‘tgan yili Samarqandda bo‘lib o‘tgan BMT jahon turizm tashkiloti bosh Assambleyasining 25-yubiley sessiyasi doirasida “The Samarkand express” sayyohlik poezdi ishga tushirilishi tufayli turizm salohiyatini rivojlantirishda muhim qadam tashladi”, deyiladi xabarda.

Maʼlum boʻlishicha, poyezd nafaqat transport vositasi, balki yoʻlovchilarga qadimiy va zamonaviy Oʻzbekiston tarixi, anʼanalari va turmush tarzi bilan tanishish imkoniyatini beruvchi madaniy almashinuv platformasi boʻladi.

“The Samarkand express” – yo‘lovchilarga mislsiz qulayliklar va unutilmas sayohat tajribasini taqdim etadigan hashamatli poyezddir. Yoʻlovchilar keng va nafis kupelar, sarxil taomlar, yuqori darajali xizmat koʻrsatish va goʻzal Oʻzbekiston landshaftlarining hayratlanarli manzaralarini taqdim etuvchi panoramali oynalardan foydalanishlari mumkin boʻladi.

• Italiya
• Poyezd
• Sayyoh