Avval xabar berilganidek, 17-18-may kunlari Toshkentda Italiya va Oʻzbekiston futboli afsonalari uchrashuvi oʻtkaziladi.

Oʻzbekiston futbol assotsiatsiyasi va BMB Trade Group kompaniyasi tomonidan oʻzbek futbolining 110-yilligiga bagʻishlab oʻtkazilayotgan ushbu oʻyinda uzoq yillar davomida yurtimiz sharafini munosib himoya qilgan futbolimiz afsonalari milliy terma jamoa bilan xayrlashadilar.

Shu munosabat bilan 6-may kuni mazkur tadbirlarga bagʻishlab matbuot anjumani oʻtkazildi.

Unda OʻFA birinchi vitse-prezidenti Ravshan Ermatov, BMB Trade Group kompaniyasi Kuzatuv kengashi raisi Bekzod Mamatqulov, Oʻzbekiston Milliy media assotsiatsiyasi raisi, BMB Trade Group kompaniyasi Kuzatuv kengashi raisi maslahatchisi Sherzodxon Qudratxoʻja kabi rasmiylar hamda turli OAV vakillari ishtirok etishdi.

Anjumanda Italiya futboli afsonalari oʻrtasidagi futbol uchrashuvi tarixiy oʻyin hisoblanishi, ikki xalq orasidagi doʻstona munosabatlar sport orqali yanada mustahkamlanishini alohida qayd etildi va tarixiy uchrashuv doirasida tashkil etiladigan tadbirlar boʻyicha jurnalistlar tomonidan yoʻllangan savollarga javoblar olindi.

Shuningdek, tadbirda onlayn-formatda Italiyadan O‘zbekistonning Italiyadagi favqulotda va muxtor elchisi Otabek Akbarov, italiyalik hamkor Roberto Tuchchi, Energy Systems kompaniyasi prezidenti, “Milan” klubi hamkorlik bo‘yicha direktori Mauro Tavola, “Milan”ning afsonaviy hujumchisi, hozirda jamoa menejeri Daniele Massaro, “Milan”ning sobiq futbolchisi Kristian Zakkardo ishtirok etdi.

Anjumanda ikkala terma jamoa tarkibi ham tanishtirib oʻtildi. Unga koʻra:

Oʻzbekiston futbol afsonalari: Pavel Bugalo, Ignatiy Nesterov, Baxtiyor Ashurmatov, Vitaliy Denisov, Anzur Ismoilov, Shavkat Mullajonov, Akmal Shoraxmedov, Asqar Jadigerov, Islom Inomov, Asror Aliqulov, Odil Ahmedov, Server Jeparov, Timur Kapadze, Sanjar Tursunov, Aziz Xaydarov, Jasur Hasanov, Eldor Magdeyev, Aleksandr Geynrix, Bekzod Mamatqulov, Shuhrat Mirxoldirshoyev, Nosir Otaqoʻziyev, Anvar Soliyev, Neʼmatillo Qutiboyev.

Murabbiy: Birodar Abduraimov.

Italiya futbol afsonalari: Kristian Abbiyati, Luka Antonini, Dario Shimich, Kristian Dzakkardo, Kristian Zenoni, Sezariya Eduardo, Nasimento Santos Aldair, Kandela Vinsent, Luidji Di Byadjo, Andjelo Karbone, Marek Yankulovskiy, Serjio Klaudio Dos Santos (Serjinyo), Lyudovik Jyuli, Robson Toledo Machado, Alberto Djilardino, Daniyele Massaro, Vinchenso Yakvinta.

• Futbol
• Italiya
• O‘zbekiston