O‘zbekistonda Ma’muriy javobgarlik to‘g‘risidagi kodeks yangi tahrirda ishlab chiqiladi. Bu prezidentning 8-may kuni kuchga kirgan farmoyishida belgilandi.

Hujjatga ko‘ra, ma’muriy javobgarlik tizimini zamonaviy talablar asosida qayta ko‘rib chiqish, eskirgan normalarni bekor qilish va yangi huquqbuzarliklar uchun javobgarlik choralarini joriy etish rejalashtirilgan.

Shuningdek, ma’muriy jazolar tizimini takomillashtirish, muqobil jazo choralarini kengaytirish, inson huquqlari va qonuniy manfaatlarini himoya qilish mexanizmlarini kuchaytirish ko‘zda tutilgan.

Farmoyish bilan ma’muriy qonunchilikni takomillashtirish bo‘yicha idoralararo komissiya tashkil etildi. Uning tarkibidan Oliy sud, Bosh prokuratura, Ichki ishlar vazirligi va boshqa mutasaddi idoralar vakillari o‘rin olgan.

Adliya vazirligi 2027-yil 1-aprelga qadar yangi tahrirdagi kodeks loyihasini ishlab chiqib, jamoatchilik muhokamasidan o‘tkazishi kerak bo‘ladi.

Ma’lumot uchun, amaldagi Ma’muriy javobgarlik to‘g‘risidagi kodeks 1994-yilda qabul qilingan bo‘lib, 1995-yildan buyon amal qilib kelmoqda.