O‘zbekistonda sodir etilayotgan kiberjinoyatlarning 90 foizi chet davlatlardan turib amalga oshirilmoqda. Bu haqda Ichki ishlar vaziri o‘rinbosari, polkovnik Ramazon Ashropov O‘zbekiston aholisiga qilgan murojaatida ma’lum qildi.

Uning ta’kidlashicha, bugungi kunda sodir etilayotgan deyarli har ikkita jinoyatning bittasi axborot texnologiyalari orqali amalga oshirilmoqda. Kiberjinoyatlarning asosiy qismi transchegaraviy xususiyatga ega.

Ramazon Ashropovning qayd etishicha, kiberjinoyatlarga qarshi kurashishda faqat huquqni muhofaza qiluvchi organlarning sa’y-harakati yetarli emas. Uning so‘zlariga ko‘ra, firibgarlar fuqarolarning soddaligi, beparvoligi va raqamli savodxonligi yetarli emasligidan foydalanmoqda.

Ichki ishlar vaziri o‘rinbosari fuqarolarni ijtimoiy tarmoqlardan kelgan shubhali, ayniqsa APK formatidagi fayllarni ochmaslik va yuklab olmaslikka chaqirdi. Shuningdek, notanish raqamlardan qo‘ng‘iroq qilib, o‘zini idora xodimi sifatida tanishtirgan shaxslarga ishonmaslik, telefon orqali beriladigan kod va parollarni aytmaslik tavsiya etildi.

Bundan tashqari, fuqarolarga pulni qisqa muddatda bir necha barobar ko‘paytirishni va’da qiluvchi soxta onlayn platformalardan ehtiyot bo‘lish, onlayn savdolarda sotuvchining ishonchliligiga ishonch hosil qilmasdan oldindan to‘lov qilmaslik hamda bank kartasi PIN-kodi va telefonga kelgan SMS-kodni hech kimga bermaslik tavsiya qilindi.

Rasmiylarning murojaatida kiberxavfsizlik qoidalariga rioya qilish va bu boradagi ma’lumotlarni oila a’zolari, farzandlar hamda keksalarga yetkazish muhimligi ta’kidlandi.