Joriy yil 3-iyun kuni Qishloq xo‘jaligi vazirligida vazir o‘rinbosari Alisher To‘rayev hamda Mo‘g‘uliston tashqi ishlar vaziri o‘rinbosari Batsumber Munxjin o‘rtasida uchrashuv bo‘lib o‘tdi.

Uchrashuvda tomonlar ikki davlat o‘rtasidagi qator masalalar bo‘yicha o‘zaro hamkorlikni jadallashtirishdan manfaatdor ekanligini bildirdilar.

Xususan, Batsumber Munxjin Mo‘g‘uliston qishloq xo‘jaligi haqida maʼlumot berib, chorvachilik mamlakat agrar sektorining eng rivojlangan tarmog‘i hisoblanishi hamda hozirda mamlakatda 70 millionga yaqin yirik va mayda qoramol bo‘lsa, shundan 35 millionga yaqini qo‘y ekanini taʼkidlab o‘tdi. Shuningdek, Munxjin bugungi kunda o‘zaro tovar yetkazib berish asosan quruqlikdagi transport orqali amalga oshirilayotganini taʼkidlab, shu munosabat bilan mamlakatlar o‘rtasidagi savdo-sotiqning yangi yo‘lagi sifatida charter reyslarini yo‘lga qo‘yish taklifini bildirdi.

Bundan tashqari, O‘zbekiston Tashqi ishlar vazirligi rahbariyati bilan Hukumatlararo komissiya tuzish va uning birinchi majlisini 2022-yilning ikkinchi yarmida o‘tkazish bo‘yicha kelishuvga ham erishilgan.

Uchrashuv yakunlari bo‘yicha O‘zbekistondan Mo‘g‘ulistonga yetkazib beriladigan oziq-ovqat va qishloq xo‘jaligi mahsulotlari hajmini oshirish (O‘zbekistonda har yili 20 mln tonnadan ziyod mahsulot ishlab chiqariladi va dunyoning 100 ga yaqin davlatiga 80 dan ortiq turdagi yangi va qayta ishlangan meva-sabzavotlar eksport qilinadi), Mo‘g‘ulistondan go‘sht va go‘sht mahsulotlari yetkazib berish hajmini oshirish hamda tomonlar O‘zbekiston va Mo‘g‘ulistonning o‘zaro savdo va qo‘shma loyihalarni yo‘lga qo‘yishda hamkorlik qilishdan manfaatdor korxonalari ro‘yxatini tuzish kabi kelishuvlarga erishildi.

Qolaversa, bog‘dorchilik va issiqxonalarni rivojlantirish bo‘yicha O‘zbekiston tajribasini o‘rganish bo‘yicha ikki davlat ilmiy idoralari o‘rtasida hamkorlik yo‘lga qo‘yiladi.

• Go‘sht
• Hamkorlik
• Import
• Mo‘g‘uliston
• O‘zbekiston