“2022-2030-yillarda aholini ijtimoiy himoya qilish milliy strategiyasini tasdiqlash to‘g‘risida”gi Prezident farmoni loyihasiga ko‘ra, 2022-yil 1-avgustdan boshlab, byudjetdan tashqari Moliya vazirligi huzurida yuridik shaxs maqomiga ega bo‘lmagan 5 ta shtat birligidan iborat Ijtimoiy sug‘urta jamg‘armasi tashkil etiladi.

Shuningdek, hududiy Moliya bosh boshqarmalari huzurida ham 2 ta shtat birligidan iborat hududiy jamg‘armalar tashkil etiladi.

Hujjat loyihasiga ko‘ra, Jamg‘armaning asosiy maqsadi fuqarolarning kutilmagan holatlarda (vaqtinchalik mehnatga layoqatsizlik, baxtsiz hodisa, ish o‘rinlarining qisqarishi va boshqa holatlarda) daromadsiz qolishdan himoya qilish etib belgilanmoqda.

Jamg‘armaning asosiy vazifalari quyidagilardan iborat:

– rasmiy ishlovchi xodimlarda ijtimoiy sug‘urta xodisalari yuzaga kelganda qonunchilikda belgilangan tartibda kafolatlangan to‘lovlarni amalga oshirilishini taʼminlash;

– Jamg‘arma tushumlari va xarajatlarini hisobini yuritish va monitoring olib borish;

– ijtimoiy sug‘urta tizimini takomillashtirib borish.

Jamg‘arma manbalari etib esa dastlabki bosqichda, Davlat byudjeti mablag‘lari, keyingi bosqichda, xodimlar tomonidan to‘lanadigan majburiy ijtimoiy ajratmalar, ijtimoiy soliq tushumining bir qismi va Davlat byudjeti mablag‘lari hisoblanadi.

Bundagn tashqari, Jamg‘arma mablag‘lari hisobidan:

– birinchi bosqichda, 2022-yil 1-sentyabrdan boshlab byudjet tashkilotlaridan tashqari barcha yuridik shaxslarda oxirgi 6 oy davomida uzluksiz ish stajiga ega bo‘lgan ayollarga har oy uchun minimal isteʼmol xarajatlari miqdoridan kelib chiqqan holda Davlat byudjeti mablag‘lari hisobidan homiladorlik va tug‘ish nafaqasi to‘lanadi. Bunda, ishlovchi ayollarga homiladorlik va tug‘ish nafaqasining uning mehnat staji va ish haqidan kelib chiqib belgilangan miqdorining qolgan qismini to‘lash ish beruvchilar hisobidan amalga oshiriladi;

– ikkinchi bosqichda, 2024-yildan boshlab xo‘jalik korxonalarida rasmiy ishlovchi ayollarga umumiy ish staji va sug‘urtalangan staji hamda o‘rtacha ish haqi miqdoridan kelib chiqib, homiladorlik va tug‘ish nafaqasini to‘lash va bu orqali ushbu xarajatlar ish beruvchi zimmasidan to‘liq olinadi;

– uchinchi bosqichda, 2025-2030-yillarda vaqtincha mehnatga qobiliyatsizlik nafaqasi, ishsiz qolish nafaqasi, ishlab chiqarishdagi baxtsiz hodisalar va kasb kasalliklari oqibatidagi sug‘urta to‘lovlari amalga oshiriladi.

• Farmon
• Jamg‘arma
• Loyiha