Mana ikki yarim oydirki Boysun aholisi zaharli gazdan qiynalyapti. Sentyabr oyida boshlangan mazkur texnogen hodisaga 2 yarim oydan oshdi. Bu orada yozayotgan va gapirayotgan jurnalistlar ham biroz tin oldi. Xo‘sh, Boysunda vaziyat qanday?

Shu yilning 1-sentyabr kuni Surxondaryo viloyatining Boysun tumanida joylashgan “Mustaqillikning 25 yilligi” konidagi 604-sonli quduqda burg‘ilash ishlarini olib borish jarayonida texnologik jarayonning buzilishi natijasida vodorod sulfid gazi sizib chiqqani tasdiqlangan edi. Oradan 15 kun o‘tib, quduq germetiklangani ta’kidlandi. Shundan so‘ng boysunliklarning joniga biroz oro kirdi. Oradan 2 kun o‘tib aynan o‘sha quduqdan yana gaz chiqishni boshladi. Mazkur holatdan keyin 4 kishi halok bo‘lgani va 11 kishi jarohat olib shifoxonaga joylashtirilgani ta’kidlangandi. Mana 2 oydan oshiq vaqt davomida kon atrofidagi aholi mazkur zaharli gazdan aziyat chekmoqda. Kimdir ko‘chib ketdi kimdirlar taqdiriga ko‘nib, sog‘ligini o‘rtaga qo‘yib yashab kelmoqda. Zaharli gazdan asosan xasta qariyalar, bolalar va homilador ayollar qiynalmoqda. Ular bugungi kunda kollej yotoqxonalariga joylashtirilgan. Aholi vakillari hali qishga tayyorgarlik ko‘rmaganini va ko‘chib yurishlar juda ham qiyinlik qilayotganini ta’kidlashmoqda.

Mutasaddilar tomonidan mazkur muammo bartaraf etilishi haqida esa turlicha sanalar aytilmoqda. Xususan, 1 oycha oldin Energetika vaziri Jo‘rabek Mirzamahmudov “Lolazor” podcastida quduq hali yopilmaganini u yerda mutaxassislar ishlayotgani, AQShning texnogen holatlar bo‘yicha mutaxassislariga ega bo‘lgan 3 ta kompaniyasi Ozarbayjonning Socar kompaniyalaridan ishchi guruhlar kelganini va ular ushbu muammo ustida ish olib borayotganini aytgan va ishchi guruh 2-3 kunda yopishga harakat qilib ko‘radi agar yopolmasa keyingi reja bilan ishlanadi va bu 2-3 oy vaqt oladi degan edi.

Yuqorida ta’kidlaganimizdek quduqdan gaz chiqib boshlaganiga 2 oydan oshdi. Aholi vakillarining Gazeta.uzga bergan intervyusida ta’kidlanishicha, yoshi katta, yurolmaydiganlar qishloqdan chiqmagani va haliyam gazlanib yotibdi. Eng achinarlisi oldinda butun qish turibdi. Gazdan qochgan aholi vakillari esa unga umuman tayyorgarlik ko‘rmagan. Mutasaddilar esa mazkur holat bo‘yicha hech qanday tayyorgarlik ko‘rmayapti shekilli oldindagi qish, kondagi holat bo‘yicha hech qanday ma’lumot berilmayapti.

Uyini tashlab Boysun atrofidagi qishloqlarga vaqtincha ko‘chib ketgan odamlarning aytishicha, odatda qishga tezaklar bilan tayyorgarlik ko‘riladi. Ammo ular bu yil ularni ham qilishga ulgurmagan, uyiga borsa gazlanib qolyapti bormasa ko‘p ishlari orqaga surilib ketyapti.

Shu o‘rinda savollar tug‘iladi. Kunlar sovib, sovuq qishning nafasi sezilib qolgan bir paytda boshqa uylardan qo‘nim topgan boysunliklar qishda nima qiladi? Ularning uyi, moli, qolib ketayotgan daromadli ishlari nima bo‘ladi? Avariyaga uchragan kon qachon yopiladi? Rasmiylardan munosabat va ijobiy tomonga o‘zgarishlarni kutib qolamiz.

Tayyorladi: Ilyos Boltayev

• Boysun
• Gaz
• Surxondaryo