Ispaniyalik rassom Pablo Pikassoning “Soatli ayol” kartinasi 139,4 million dollarga sotildi. Bu rassomning eng katta summaga sotilgan ikkinchi asari hisoblanadi.

Maʼlumotlarga ko‘ra, surat 2023-yilda kimoshdi savdosida sotilgan eng qimmat rasmga aylandi. Uning dastlabki narxi taxminan 120 million dollarga baholangandi. So‘ng salkam 140 mln dollarga xarid qilingan.

Rasm 1932-yili 130x97 sm o‘lchamda chizilgan. Unda Pikassoning sevgilisi Mari-Terez Valter qo‘l soati bilan birga tasvirlangan.

1966-yili bu asarni Bazeldagi Beyeler galereyasi sotib olgan. 1968-yilda Nyu-Yorkdagi Pase galereyasi kolleksiyasiga qo‘shilgan.

Keyinroq "Soatli ayol" surati kolleksioner Emili Fisher Landau tomonidan sotib olingan va 50 yildan ko‘proq vaqt davomida uning kvartirasida saqlangan.

Kolleksiyachi 2023-yil mart oyida vafot etgandan so‘ng, Sothebyʼs auksion uyi uning 400 million dollarga yaqin 120 ta asardan iborat kolleksiyasini sotish huquqini qo‘lga kiritgan.

Eslatib o‘tamiz, 2021-yil oktyabr oyida Gonkongda Pikassoning “Chaqirayotgan ayol” kartinasi 24,6 million dollarga sotilgandi.

• Rasm
• pul
• rassom