Turkiya Prezidenti Rajab Toyyip Erdog‘an 27-aprel kuni mamlakatga Rossiya Prezidenti Vladimir Putin tashrif buyurishi mumkinligini ma’lum qildi. Avvalroq u aynan shu kuni Mersindagi “Akkuyu” atom elektr stansiyasiga yadro yoqilg‘isi yetkazib berish rejalashtirilganini aytgandi.

“27-aprelda, balki, janob Putin ham keladi yoki biz onlayn bog‘lanib, birinchi qadamni qo‘yamiz, degan umiddaman”, – deydi Erdog‘an “A Haber” telekanaliga bergan intervyusida.

“RIA Novosti”ning yozishicha, Turkiyadagi “Akkuyu” AES qurilishi maydonchasiga yadro yonilg‘isi yetkazib beriladi va o‘sha yerdagi yangi yonilg‘i saqlash manziliga joylashtiriladi. Yonilg‘i yetkazib berilgan ondan boshlab “Akkuyu” yadroviy inshootga, Turkiya esa atom energetikasi mavjud mamlakatga aylanadi.

Eslatib o‘tish mumkin, Rossiya ishtirokida qurilayotgan mazkur majmua Turkiyadagi birinchi atom elektr stansiyasi. Inshootning 4 blogi Rossiyaning ilg‘or “VVER-1200” reaktorlari bilan jihozlanadi. Ushbu uskunalarning hammasi ishga tushgach, stansiya yiliga 35 milliard kilovatt-soatga yaqin elektr energiyasi ishlab chiqaradi. Bu miqdor mamlakatning elektr energiyasiga bo‘lgan 10 foiz ehtiyojini qoplashi ko‘zda tutilgan.