Samarqandga tashrifining ikkinchi kuni Prezident Shavkat Mirziyoyev Imom Moturidiy yodgorlik majmuasida davom etayotgan qurilish va obodonlashtirish ishlarini ko‘zdan kechirdi.

O‘tgan yil O‘zbekistonda aqida ilmining asoschisi Abu Mansur Moturidiy tavalludining 1155-yilligi keng nishonlangandi. Shu munosabat bilan Chokardiza qabristoni hududida majmua qayta ta’mirlanib, obodonlashtirish ishlari boshlangan.

Hozirda 26 gektar maydondagi majmuada 250 o‘rinli masjid, kirish peshtoqi, ilmiy markaz, kutubxona, muzey va avtoturargoh bunyod etilmoqda. Qurilish ishlari davomida Chokardiza qabristonida buyuk faqih Burhoniddin Marg‘inoniy dafn etilgan joy aniqlanib, bu yerga maqbara qurilmoqda.

Tashrif davomida Qur’on tilovati o‘qildi, allomalar yodga olindi. Prezident bunyodkorlik ishlarini ko‘zdan kechirib, majmua dunyo musulmonlari talpinadigan ziyorat maskani ekanini qayd etdi va zamon talablariga mos sharoit yaratish zarurligini ta’kidladi.

“Majmuaga kelgan kishi avvalo Imom Moturidiy bobomizning ilmiy-ma’naviy merosi va islom olamidagi mavqei haqida yorqin tasavvurga ega bo‘lishi, allomaning ma’rifatparvar qarashlari bugun ham dolzarbligini his qilishi kerak”, – dedi Prezident.

Shuningdek, qurilishning sifatli va o‘z vaqtida bajarilishi hamda hududda yashil maydonlarni ko‘paytirish bo‘yicha topshiriqlar berildi.

• Prezident
• Samarqand
• Tashrif