31°
Kechasi 18°
Dunyoning u tomonida jonsiz tanasi toshlar ostida yotgan begunoh bolaning qo‘llari, dunyoning bu tomonida esa, har kuni qo‘lida kitoblari ila maktabga borib qaytadigan jiyanlarim… G‘azo bolalar qabristoniga aylanib borayotgani yuragi bor insonni larzaga solishi, shubhasiz. Jang qilayotgan kattalar-u jon berayotgan bolalar…
Isroil va XAMAS o‘rtasidagi urush joriy yilning 7-oktyabr kuni Isroil hududiga yuzlab raketalar otilgani bilan boshlandi. Isroil hukumati bunga javoban XAMASga qarshi urush e’lon qildi va G‘azo sektorini keng ko‘lamli o‘qqa tuta boshladi.
“G‘azo – bolalar qabristoni”!
4-noyabr holatiga ko‘ra, G‘azoda Isroil zarbalari oqibatida halok bo‘lganlar soni 9488 kishiga yetdi. Shulardan 3 648 nafari bolalar, 2 290 nafari ayollardir. G‘azo Sog‘liqni saqlash vazirligi ma’lumotlariga ko‘ra, jarohatlanganlar 22 219 kishini tashkil etmoqda, 2 030 kishi bedarak yo‘qolgan.
UNICEF G‘azo bolalar qabristoniga aylanganini ma’lum qildi. Shu kungacha Falastin anklavidagi voyaga yetmaganlar soni 3,4 mingdan oshdi. Bu haqda Jenevada bo‘lib o‘tgan brifingda BMT Bolalar jamg‘armasining rasmiy vakili Jeyms Elder ma’lum qildi.
U Isroil hukumatini zudlik bilan o‘t ochishni to‘xtatishga va insonparvarlik yordamining uzluksiz kelishi uchun barcha o‘tish punktlarini ochishga chaqirganini takrorladi. “Agarda 72 soat davomida o‘t ochishni to‘xtata olganimizda edi, bu 1000 nafar bolani yana xavfsiz holatga keltirish imkonini berardi”, – dedi UNICEF vakili.
Elderning ta’kidlashicha, bolalar hayotiga tahdid “bomba va minomyotlar bilan cheklanmaydi”. Suvsizlanishdan chaqaloqlar o‘limi anklavda “o‘sib borayotgan tahdid” bo‘lib, G‘azoda suv ishlab chiqarish unga bo‘lgan talabning 5 foizini tashkil qiladi. Buning sababi shundaki, ko‘pchilik tuzsizlantirish qurilmalari shikastlangani yoki yoqilg‘i yetishmasligi sababli ishlamayapti.
“Dunyo yetarli deyishi uchun G‘azoda qancha bola o‘lishi kerak? – shotlandiyalik vazir.
Dunyo yetarli deb aytishi uchun G‘azoda yana qancha bola o‘lishi kerak? Ushbu gapni Shotlandiyaning birinchi musulmon vaziri Hamza Yusuf o‘zining X sahifasida yozib qoldirdi.
X’dagi postida Yusuf G‘azoning kuchli bombardimon ostida qolgani, telekommunikatsiyalar uzilib qolgani va deyarli 3 haftadan beri mintaqada qamalib qolgan oila a’zolari bilan bog‘lana olmayotganini qayd etgan.
“Biz faqat ular tunda omon qolishlari uchun ibodat qilishimiz mumkin. Dunyo yetarli deguncha yana qancha bola o‘lishi kerak?”, deydi vazir.
“Barcha o‘quvchilarimiz o‘lganligi sababli 2023/2024-o‘quv yili tugatildi…”
Ijtimoiy tarmoqlarda G‘azoda o‘quv yili tugagani, chunki ko‘plab o‘quvchilar halok bo‘lgani haqida ko‘plab postlar tarqalmoqda.
“Barcha o‘quvchilarimiz o‘lganligi sababli 2023/2024-o‘quv yili tugatildi…”, deyiladi Instagram postlaridan birida. Biroq 2023/24-o‘quv yili bekor qilingani haqida hech qanday rasmiy xabar yo‘q va bularning barchasi asossiz noto‘g‘ri ma’lumotdir.
Twitter’dagi eng birinchi post 26-oktabrda, tadbirkor Fares Shahabi vayron bo‘lgan G‘azodagi bolalar tasviri bilan bo‘lishganda paydo bo‘ldi.
“G‘azoda bu o‘quv yili maktablarning vayron bo‘lishi va o‘quvchilarning o‘limi tufayli bekor qilindi...!”, deya sarlavhaga yozdi.
O‘quv yili bekor qilinmadi, lekin bolalarning qatnashishi dargumon, chunki ko‘p joylar vayron bo‘lgan va boshqa binolar favqulodda boshpana sifatida foydalanilayotgani haqida aytilmoqda.
“G‘azo oldin qamoqxona edi, endi qabristonga aylandi”
“Bu qochadigan joyi yo‘q, qamaldagi aholini ataylab bombardimon qilishdir. G‘azo qariyb yigirma yil davomida ochiq qamoqxona bo‘lib kelgan va tez sur’atlarda ommaviy qabristonga aylanib bormoqda. Halok bo‘lganlarning 40 foizi begunoh bolalardir. Butun boshli oilalar o‘ldirilmoqda. Dunyo bunga guvoh bo‘layotgan va ko‘plab hukumatlar faol qo‘llab-quvvatlayotgan bir paytda millionlab falastinlik tinch aholi – bolalar, ayollar, oilalar xalqaro huquqqa zid ravishda jazolanmoqda va oziq-ovqat, dori-darmon, insonparvarlik yordamidan mahrum qilinmoqda” – Anjelina Joli.
Taniqli Gollivud aktrisasi Anjelina Joli G‘azo sektorida begunoh halok bo‘layotgan aholini haqda o‘zining Facebook’dagi sahifasida post qoldirdi.
Uning so‘zlariga ko‘ra, insonparvarlik sulhini talab qilishdan bosh tortish va BMT Xavfsizlik Kengashining har ikki tomonga ham kelishuvni yuklashiga to‘sqinlik qilish bilan dunyo yetakchilari bu jinoyatlarga sherik bo‘lyapti.
Shuningdek, Anjelina Joli sektorga yetkazib berilayotgan insonparvarlik yordamlariga bo‘lgan talab tobora ortayotganiga to‘xtaldi va butun insoniyat nomidan sulh talab qildi.
“Insoniyat zudlik bilan sulh talab qiladi. Falastin va isroilliklarning hayoti butun dunyodagi barcha odamlarning hayoti bilan teng ahamiyatga ega”, dedi BMTning sobiq elchisi.
Aktrisaning bildirishicha, u ham G‘azo sektoriga tibbiy yordam uchun xayriya qilgan.
“Yana qancha bolalar o‘lishini kutmoqdasiz?”
Turkiyadagi Misr, Eron, Iroq, Livan hamda Iordaniya elchixonalari oldiga “yana qancha bolalar o‘lishini kutmoqdasiz?”, deya yozilgan bolalar tobutlari qo‘yib ketildi.
So‘ngi ma’lumotlarga ko‘ra, XAMAS 7-oktyabrda asirga olingan barcha isroilliklarni ozod qilish yuzasidan kelishuv bo‘yicha Isroil bilan to‘liq murosaga tayyor, evaziga esa Isroil qamoqxonalaridagi barcha qo‘lga olinganlar ozod etilishini talab qilmoqda.
Agar bu urushlar tezroq tugamas ekan, dunyo yana necha minglab begunoh bolalarning jasadini o‘z bag‘riga olishda davom etadi… Jurnalist: Sabohat Saidrizo
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
