Qozog‘iston parlamenti quyi palatasi (Majilis) deputati Azamat Abildayev Rossiya prezidenti Vladimir Putin va Ukrainadagi harbiy mojaroni qo‘llab-quvvatlagani uchun “Aq Jol” partiyasi tarkibidan chiqarib yuborildi. Bu haqda partiya matbuot xizmati xabar berdi.

“Azamat Abildayevni “Aq Jol” demokratik partiyasidan chiqarish to‘g‘risida qaror qabul qilindi”, – deyiladi partiya bayonotida.

Bundan tashqari, “Aq Jol” partiyasi mamlakat Markaziy saylov komissiyasiga Abildayevning deputatlik mandati tugatilgani haqida xat ham yuborgan.

Partiyaning tushuntirishicha, siyosatchining so‘zlari uning pozisiyasiga zid, shuningdek, partiyaviy va deputatlik etikasini buzadi. Ular, shuningdek, “Aq Jol” Qozog‘istonga do‘st bo‘lgan davlatlarning “mustaqilligi va hududiy yaxlitligini hurmat qiladi va qo‘llab-quvvatlaydi”.

18-yanvar kuni Azimat Abildayev “Ozodlik” radiosiga bergan intervyusida Vladimir Putinni va urushni qo‘llab-quvvatlashini aytgan.

“Men Ukraina xalqining o‘zi yoz fasligacha Zelenskiyni sudga berishiga ishonaman”, – deya qo‘shimcha qilgan deputat.

Shundan so‘ng “Ak Jol” raisi Azat Peruashev Abildayevning so‘zlari “uning shaxsiy fikri” ekanini aytgan.

“Biz partiya sifatida, birinchi navbatda, mustaqilligimizni, mamlakatning hududiy yaxlitligini himoya qilishimiz kerak”, – dedi Peruashev.

Partiya rahbarining so‘zlariga ko‘ra, “Aq Jol” Ukrainadagi harbiy mojaroni qo‘llab-quvvatlamaydi.

• Deputat
• Qozog‘iston