Turkiya prezidenti Rajab Toyyib Erdo‘g‘an Shvetsiya Turkiyadan uning NATOga kirishini ma’qullashini kutmasligi kerakligini ma’lum qildi. Erdo‘g‘an bu haqda daniyalik o‘ng qanot siyosatchi hafta oxirida Turkiyaning Stokgolmdagi elchixonasi oldida norozilik namoyishi o‘tkazib, Qur’onni yoqib yuborganidan keyin ma’lum qildi.

“Shvetsiya bizdan NATOga a’zo bo‘lishni qo‘llab-quvvatlashimizni kutmasligi kerak. Mamlakatimiz elchixonasi oldida bunday sharmandalikni sodir etganlar o‘z arizalari borasida endi bizning foydamizga umid qila olmasligi aniq”, – dedi Erdog‘an.

Rossiyaning Ukrainaga hujumidan so‘ng, Shvetsiya va Finlyandiya NATOga a’zo bo‘lish uchun ariza bergan, ammo Turkiya ittifoq a’zosi sifatida ularning qabul qilinishiga to‘sqinlik qilishi mumkin va hali tegishli hujjatlarni ratifikasiya qilmagan.

Anqara Stokgolmdan mamlakatda terrorchi, deb topilgan 70 dan ortiq odamni, asosan turk kurdlarini topshirishni talab qilmoqda.

Avvalroq Turkiya Shvetsiya mudofaa vaziri Pol Junsonning kelasi haftaga mo‘ljallangan Anqaraga tashrifini bekor qilgandi. Turkiya Mudofaa vaziri Hulusi Akar, tashrif o‘z ma’nosini yo‘qotganini ma’lum qilgan.

Ushbu aksiyani 21-yanvar, shanba kuni so‘nggi saylovlarda 1,8 foiz ovoz olgan Daniyaning islomga qarshi partiya yetakchisi Rasmus Paludan uyushtirgan. Shvetsiya polisiyasi elchixonada aksiya o‘tkazishga ruxsat berdi, ammo Qur’onni yoqishga ruxsat bermadi va Paludan uni keyinroq, elchixona yaqinida yoqib yuborgan.

Shvetsiya hukumati ham bu ishorani qoralagan.

“Shvetsiyada keng so‘z erkinligi mavjud, ammo bu hukumat yoki shaxsan men bunday fikrlarni qo‘llab-quvvatlaymiz, degani emas”, – dedi tashqi ishlar vaziri Tobias Bilstrem.

• NATO
• Rossiya
• Shvetsiya
• Turkiya
• Ukraina