Rossiyaning Odinsovo shahrida o‘tkazilgan reydlarda 15 nafar O‘zbekiston fuqarosi qo‘lga olingan. Bu haqda O‘zbekistonning Rossiyadagi elchixonasi ma’lum qildi.

Qayd etilishicha, ijtimoiy tarmoqlarda Rossiya ichki ishlar vazirligining Odinsovo shahri okrugidagi 5-politsiya bo‘limida 4 kundan ortiq vaqt davomida 15 nafar O‘zbekiston fuqarosi noqonuniy ushlab turilgani haqida xabarlar tarqalgan.

Vaziyatga aniqlik kiritish maqsadida 8-avgustda elchixonaning konsullik bo‘limi xodimlari okrukdagi bo‘limda bo‘lgan. Uchrashuv davomida o‘zbekistonliklar mamlakat ichki ishlar boshqarmasi xodimlari tomonidan Odinsovo shahar okrugida o‘tkazilgan reyd natijasida hibsga olingani aniqlangan.

Yuqorida qayd etilgan O‘zbekiston fuqarolari Moskva viloyati hududida tegishli ruxsatnomalarni rasmiylashtirmasdan mehnat faoliyatini noqonuniy ravishda olib borgan.

9-avgust kuni ular Rossiyadan chiqarib yuborish uchun IIVning Moskva viloyati bosh boshqarmasi chet el fuqarolarini vaqtincha saqlash markaziga joylashtirilgan.

O‘zbekistonning Rossiyadagi elchixonasi ushbu davlatga kelishni rejalashtirayotganlardan, shuningdek, mehnat migratsiyasi bo‘yicha shu yerdagi fuqarolardan mamlakatda belgilangan qonun hujjatlariga rioya qilishlarini so‘radi.

• Elchixona
• Rossiya