Tashrif dasturiga muvofiq, O‘zbekiston Respublikasi prezidenti Shavkat Mirziyoyev Al-Kuvayt shahridagi “As-Salom” saroy-muzeyiga tashrif buyurgan.

Saroy 1960-1964-yillarda o‘ziga xos arab me’morchiligi uslubida bunyod etilgan va 1990-yilgacha Kuvaytga tashrif buyurgan xorijiy rahbarlar uchun rasmiy qarorgoh bo‘lib xizmat qilgan.

2019-yilda saroyda muzey ochilgan bo‘lib, unda 32 ming kvadrat metr maydonda Kuvaytning ko‘p asrlik tarixi va madaniyatini aks ettiruvchi noyob eksponatlar namoyish etilmoqda.

O‘zbekiston rahbari muzey ekspozitsiyasi bilan tanishib, uning me’moriy konsepsiyasi va zamonaviy infratuzilmasini yuqori baholagan.

O‘zbekiston bilan Kuvayt madaniy almashinuvlarini, xususan, muzey ishi va tarixiy merosni asrash sohasidagi aloqalarni kengaytirish, qo‘shma gumanitar dasturlarni amalga oshirish va o‘zaro ko‘rgazmalar tashkil etish muhimligi qayd etilgan.

Yakunda O‘zbekiston prezidenti muzeyning Faxriy mehmonlar kitobida dastxat yozib qoldirgan.

• Prezident
• Shavkat Mirziyoyev
• Tashrif
• muzey