Oʻzbekistonlik grossmeyster Nodirbek Abdusattorov Islandiyadagi “World Fischer Random Chess Championship 2022” musobaqasidagi ishtirokini muvaffaqiyatli davom ettirmoqda.

Mukofot jamgʻarmasi 400 ming AQSh dollarini tashkil etuvchi ushbu nufuzli turnirda guruh bosqichi yakunlanib, 1/2 final juftliklari maʼlum boʻldi.

Abdusattorov islandiyalik Xyorvar Steyn Gretarsson, rossiyalik FIDE bayrogʻi ostida dona surayotgan Yan Nepomnyashiy va AQSh vakili Uesli Soni magʻlub etib, muddatidan avval yarim finalga yoʻl olgandi.

Kecha tunda oʻtkazilgan partiyalarda Nodirbek Nepomnyashiyni yana ikki bor magʻlubiyatga uchratdi. Uesli So bilan takroriy bahslarda bitta durang va magʻlubiyat qayd etdi hamda 10 ochko bilan guruh gʻolibi sifatida 1/2 finalga yoʻl oldi. Yan Nepomnyashiy 7 ochko bilan ikkinchi yarim finalchiga aylandi.

Eʼtiborlisi, Nodirbek Abdusattorov guruh bosqichida eng koʻp ochko jamgʻargan shaxmatchi boʻldi. Amaldagi jahon toji sohibi Magnus Karlsen 9 ochko bilan B guruhida 1-oʻrinni egalladi.

Amerikalik Xikaru Nakamura ham 9 ochko jamgʻardi va qoʻshimcha koʻrsatkichlarga koʻra guruhda ikkinchi boʻldi.

Bugun musobaqada dam olish kuni. Ertaga yarim final uchrashuvlari oʻtkaziladi. Unda A guruhi gʻolibi Nodirbek Abdusattorov B kvartetida ikkinchi oʻrinni band etgan Xikaru Nakamuraga qarshi dona sursa, ikkinchi yarim final juftligida Magnus Karlsen va Yan Nepomnyashiy oʻzaro bellashishadi.

World Fischer Random Chess Championship | 1/2 final

Nodirbek Abdusattorov (Oʻzbekiston) — Xikaru Nakamura (AQSh)

Yan Nepomnyashiy (FIDE) — Magnus Karlsen (Norvegiya)

• Jahon chempionati
• Nodirbek Abdusattorov
• Shaxmat