O‘zbekistonda yarim yil ichida minglab xonadonlar davlatga qiymati 64 milliard so‘mga yaqin Quyosh energiyasi yetkazib berdi.

Energetika vazirligi ma’lumotiga ko‘ra, joriy yilning yanvar–iyun oylarida 28 538 nafar jismoniy shaxs o‘zining Quyosh panellari orqali davlat elektr tarmoqlariga jami 63 milliard 498 million so‘mlik energiya uzatgan. Bu mablag‘ “Quyoshli xonadon” dasturi doirasida davlat byudjetidan ajratilgan subsidiya hisoblanadi.

Hududlar kesimida eng ko‘p subsidiyani Xorazm viloyati aholisi olgan — 19,1 milliard so‘m. Undan keyin 9,7 milliard so‘m bilan Qoraqalpog‘iston Respublikasi va 4,9 milliard so‘m bilan Toshkent shahri kuzatilgan. Qolgan hududlarda bu ko‘rsatkich nisbatan kam.

Subsidiya olish jarayoni qulaylashtirilgan. Fuqarolar “Soliq” mobil ilovasidagi “Keshbek va imtiyozlar” xizmatidagi “Quyoshli xonadon” bo‘limi orqali “Kartaga pul o‘tkazish” tanlanmasi yordamida mablag‘ni o‘z bank kartasiga o‘tkazib olishi mumkin.

Ma’lumot uchun, 2023-yil 1-apreldan boshlab, xonadonga o‘rnatilgan Quyosh panellari orqali davlat tarmog‘iga uzatilgan har bir kW/h energiya uchun 1 000 so‘mdan subsidiya to‘lanishi belgilangan. Ushbu dastur aholini “yashil” energiyadan keng foydalanishga rag‘batlantirish hamda qayta tiklanuvchi manbalar hissasini oshirishga qaratilgan.

• Elektr energiyasi
• Energetika_vazirligi
• statistika