Turkiya prezidenti Rajab Toyyib Erdo‘g‘on Stokgolmdagi shov-shuvli harakatlardan so‘ng Shvetsiya endi mamlakatdan NATOga ariza berish uchun qo‘llab-quvvatlashni kutmasligi kerakligini aytdi. Bu haqda u kecha, 23-yanvar kuni Vazirlar Mahkamasi yig‘ilishidan so‘ng ma’lum qildi.

"Shvetsiyadagi va hatto diplomatik vakolatxonamiz yaqinidagi bu nopok harakatlar musulmonlarga, umuman, barcha insonlarga, barcha huquq va erkinliklarga nisbatan haqorat sifatida qabul qilinadi. Siz terrorchilarni qo‘llab-quvvatlashda davom etasiz va NATOga a’zo bo‘lish uchun qo‘llab-quvvatlashni kutmoqdasiz. Bu ishlamaydi. Shvetsiya bizdan bu yordamni endi kutmasligi kerak”, dedi u.

Turkiya yetakchisi Stokgolmdan terror tashkilotlariga qarshi kurashda Turkiya oldidagi majburiyatlarini toʻliq bajarishini kutishini taʼkidladi. "Agar Shvetsiya hukumati huquq va erkinliklarni shunchalik hurmat qilsa, ular birinchi navbatda Turkiya Respublikasi va barcha musulmonlarning diniy tuyg'ularini hurmat qilishlari kerak. Agar bu hurmatni ko'rsatmasangiz, kechirasiz, lekin siz NATOga a’zo bo‘lish borasida bizdan hech qanday qo‘llab-quvvatlash olmaysiz”, dedi Erdo‘g‘an.

Turkiya hukumati shanba kuni Stokgolmda Turkiya elchixonasi oldida Qur'onning yoqib yuborilishiga keskin norozilik bildirib, bu harakatni "irqchilik" va "zamonaviy vahshiylik" deb atadi. Hukmron Adolat va Taraqqiyot partiyasi (AKP) rahbari o‘rinbosari Numan Kurtulmush, Turkiya terrorizmga qarshi kurash bo‘yicha Anqara bilan imzolangan memorandumni bajarmaguncha, Shvetsiyaning NATOga a’zolik arizasini ma’qullamasligidan ogohlantirdi.

11-yanvar kuni Stokgolmda Turkiyada terrorchi deb tan olingan Kurdiston ishchilar partiyasini qo‘llab-quvvatlash mitingi bo‘lib o‘tdi. Aksiya davomida uning ishtirokchilari Erdo‘g‘onga o‘xshash qo‘g‘irchoqni osib qo‘yishni sahnalashtirdilar. Bu voqea va Shvetsiyaning shov-shuvli aksiyaga aloqadorlarni qidirishdan bosh tortgani ham Anqaraning keskin munosabatiga sabab bo‘ldi.

• Erdogʻan
• NATO
• Shvetsiya