Shvetsiyaning NATOga a’zo bo‘lishi Turkiya Yevropa Ittifoqiga qabul qilinganidan keyin mumkin bo‘ladi. Bu haqda Turkiya prezidenti Rajab Toyyib Erdo‘g‘аn ma’lum qildi.

Turkiya yetakchisiga ko‘ra, Anqara o‘ziga berilgan barcha va’dalar bajarilishini istaydi.

"Turkiya Yevropa Ittifoqi eshigi oldida 50 yil kutishga majbur qilindi. Bizni kutishga majbur qilayotgan bu davlatlarga aytaman, Vilnyusda shuni aytaman: Turkiya uchun avval Yevropa Ittifoqi eshiklarini oching, keyin biz Shvetsiya uchun NATOga yo‘l ochamiz, xuddi Finlyandiya tomoniga qilganimizdek”, – dedi Erdo‘g‘аn NATO sammiti uchun Vilnyusga uchishdan oldin Istanbuldagi Otaturk aeroportida.

Turkiya prezidenti taʼkidlaganidek, u bu shartni AQSh prezidenti Jo Baydenga yetkazgan.

Ma’lumot uchun, Turkiya 1999-yildan beri nomzod maqomida, Xorvatiya esa 2013-yilda Yevropa Ittifoqiga oxirgi boʻlib aʼzo boʻldi, bu jarayon oʻn yil davom etdi. 2016-yildan beri Turkiya va Yevropa Ittifoqi o‘rtasida vizasiz rejim bo‘yicha muzokaralar amalda to‘xtatilgan.

NATO Bosh kotibi Yens Stoltenberg Vilnyusda Erdo‘g‘an va Kristersson o‘rtasida Shvetsiyaning Shimoliy Atlantika ittifoqi yo‘lidagi to‘siqlarni olib tashlash uchun yig‘ilish o‘tkazadi. Uchrashuv 11-12-iyul kunlari boʻlib oʻtadigan NATO sammiti arafasida o‘tkaziladi. Unda tomonlar yangi aʼzoning kirishini eʼlon qilmoqchi, biroq yakuniy ishonchnomaga hali erishilgani yoʻq.

Finlyandiya va Shvetsiya 2022-yilning may oyida Ukrainadagi voqealar fonida alyansga qo‘shilish uchun ariza topshirgan. Finlyandiya 4-aprel kuni NATOning 31-a'zosi bo'ldi. Shvetsiyaning arizasi hali Vengriya va Turkiya tomonidan ma'qullanmagan.

• Erdogʻan
• NATO
• Yevropa Ittifoqi