Tabiat resurslari vazirligi Sirdaryo viloyati boshqarmasi, viloyat prokuraturasi, Ichki ishlar va Milliy gvardiya organlari hamkorligida nazorat reyd tadbiri oʻtkazildi.

Tadbir davomida Sirdaryo viloyati Sardoba suv omboridan fuqarolar S.Q. va Sh.E. lar tomonidan 2023-yil 13-mart kuni soat 22:00 dan 14-mart soat 02:30 ga qadar vaqt oraligʻida oʻzlariga tegishli boʻlgan 2 dona rezina qayiq, 4 dona eshkak va 4 dona uzunligi 320 metr boʻlgan taqiqlangan baliq tutish quroli, yaʼni leskali toʻr yordamida jami 6 turdagi 388 dona baliqni noqonuniy ravishda ovlaganlik holati aniqlangan.

Qayd etilishicha, holat yuzasidan huquqbuzarlarga nisbatan hujjatlar rasmiylashtirilib, hayvonot dunyosiga yetkazilgan 105 million 870 ming soʻm zarar miqdori belgilangan.

Maʼlum qilinishicha, mazkur holat yuzasidan surishtiruv ishlari olib borilmoqda.

• Baliq
• Huquqbuzarlik
• Sirdaryo