Sochlarning hajmdor emasligi koʻplab ayollar duch keladigan muammolardan biri. Qizlar va ayollar ushbu muammoni hal qilishga urinib, maxsus kosmetik vositalar, sochlarni shishirish va boshqa mashhur usullardan foydalanishadi. Siz ham barcha usullarni sinab koʻrib, hech qanday natijaga erisha olmagan boʻlsangiz, quyidagi layfxaklar yordam berishi mumkin.

1-layfxak. Avval konditsioner

Birinchi navbatda muammoni sochlarni yuvish jarayonidan qidiramiz. Shubha yoʻqki, siz ham koʻpchilik qizlar kabi sochlaringizni avval shampun bilan yuvib, keyin tolalarga konditsioner surtishga odatlangansiz. Biz sizga ana shu ketma-ketlikni oʻzgartirishni maslahat beramiz. Birinchidan, konditsioner sochlarni yuvishga tayyorlab beradi va shampundan keyingi quruqlikdan himoya qiladi. Ikkinchidan, bunday texnika sochlarni turmaklayotganda ularga juda yaxshi hajm beradi. Shampundan oldin ishlatilgan konditsioner tolalarning uchini namlantiradi, lekin ularni ogʻirlashtirib qoʻymaydi.

2-layfxak. Quruq shampundan foydalaning

Qoidaga koʻra, quruq shampunni sochlaringizni yuvishga vaqt topa olmaganingizda qoʻllash tavsiya etiladi. Quruq shampun soch tolalarining kirini oʻziga tortib oladi va ularni toza koʻrinishga keltiradi. Bunday vosita tezlik bilan sochlarni tartibga keltirib olishga va ularni hajmdor koʻrsatishga yordam beradi. Shampun tugmasini bir necha marta bosishingiz bilan sochlaringiz avvalgidan ancha yaxshi koʻrinadi. Bundan tashqari, ixchamroq idishdagi shampun sotib olsangiz, uni yoningizda olib yursangiz ham boʻladi.

Quruq shampun sochlar ildiziga hajm beradi, sochlaringiz hajmdor boʻlib turishi uchun shampunni faqat kir sochlarga emas, toza sochlar ildiziga ham sepsa boʻladi. Biroq, bu usuldan koʻp foydalanish yaramaydi. Shampun tabiiy mahsulotlardan tayyorlangani bilan bosh terisidagi teshikchalarning yopilib qolishiga olib keladi. Teshiklar chang va kirga toʻlib qoladi. Bosh terisi shampun qatlami bilan yopilib qolgan boʻlsa, soch tolalari kabi nafas ololmaydi. Bu bosh terisining qichishishi va yalligʻlanishga olib keladi, shuning uchun vositadan foydalanishda meʼyorni unutmagan maʼqul.

3-layfxak. Farqni boshqa tomondan oching

Sochlarning farqini har doim bitta tomondan ochish odati koʻpchilikda bor. Sochlar ham bora-bora farq ochilgan holatga oʻrganib qoladi. Bunday befarqlik esa yoqimsiz oqibatlarga olib kelishi mumkin. Birinchidan, bu sochlar uchun zararli — farq ochilgan joydagi soch tolalari oz-ozdan toʻkilib, ochiq joy paydo boʻladi. Ikkinchidan, farqning oʻrni tez-tez oʻzgartirib turilmasa, soch turmaklari hajmdor boʻlib chiqmaydi. Sochlaringizni yuvib chiqqandan keyin, boshingizni fen bilan quritayotganingizda farqni boshqa tomondan oching. Shunda ularni oʻzingiz xohlagan tomonga qaratib taraydigan boʻlasiz.

Eʼtibor bering: sochlaringizning farqini bugun bitta tomondan ochsangiz, ertaga uning oʻrnini berkiting va farqni ikkinchi tomondan oching. Bunday hiyla sochlar zaiflashishining oldini oladi, shuningdek sochlarni hajmdor va toza qilib koʻrsatadi.

4-layfxak. Sochlarni quritishda qoʻllarni ham ishga soling

Sochlar sogʻlom va hajmdor koʻrinishi uchun ularni fen bilan quritayotganda taroqdan foydalanish kerak emas. Bunday holatda ularni yulib olishingiz mumkin. Hoʻl sochlar odatda taroq bilan taralsa, tolaga ham, ildiziga ham zarar yetadi. Sochlarni quritishda ularni barmoqlar bilan biroz yuqoriga koʻtarib, keyin fenni ishga solish kerak. Sochlar kerakli koʻrinishga kirganidan keyin jarayonni taroq yordamida yakunlash mumkin. Soch turmagi tayyor boʻlganidan keyin boshingizni pastga eging va fenning issiq havo oqimini sochlar orasiga yoʻnaltiring. Bu ham sochlarga qoʻshimcha hajm beradi!

5-layfxak. Sochlarni boshqacha usulda turmaklang.

Yoyilgan sochlar hajmdor va chiroyli koʻrinishiga qaramay, ularni rezinka bilan yigʻsangiz, soch tolalari hajmidan asar ham qolmaydi. Sochlar siyrak ekanligini darhol “sotib qoʻyadi”. Xayriyatki, ushbu muammoning ajoyib yechimi bor. Buning uchun sochlarni yigʻing, ularning ustki qismidan bir tutam tolani ajratib olib, ostiga toʻgʻnagʻich taqib qoʻying. Shundan keyin soch tolasini toʻgʻnagʻich ustidan tushirish mumkin. Shuning oʻziyoq sochlarga qoʻshimcha hajm beradi.

6-layfxak. Sochlarni shishirish ham mumkin

Ha, biz bu usul haqida avvaldan yaxshi bilganmiz. Hozir esa sochlarni shishirish urfdan chiqib ketgan. Shunga qaramasdan sochlarni taroq yordamida yengil shishirib olish zarar qilmaydi. Undan ham yaxshiroq yana bir usul bor. Bu soch tolalarini taroq bilan emas, tish choʻtkasi yordamida shishirish. Sochlarni bir nechta tutamlarga ajratib oling va tish choʻtkasi bilan tolalarning ildiz qismini shishiring. Bunday hiyla sochlaringizning hajmdor koʻrinishiga yordam beradi.

7-layfxak. Kosmetik vositalarning keraklisini tanlang

Doʻkonlarning rastalarida turgan sochlarni parvarish qilish vositalarini koʻrib, qaysi birini tanlashni bilmay qolasiz. Doʻkonga kosmetik vosita xarid qilishga borganingizda ayrim qoidalarni unutib qoʻymang: sochlaringiz siyrak boʻlsa, gel va yogʻ sotib olish haqida oʻylamasangiz ham boʻladi. Ular soch tolalarini ogʻirlashtirib qoʻyadi va kerakli hajmni bera olmaydi. Baʼzida esa bor hajmni ham yoʻq qiladi. Maxsus koʻpik, muss, yengil spreylar gel va yogʻdan farqli oʻlaroq, muammoni hal qilishi mumkin. Misol uchun, kaftingizga ozroq muss siqib chiqarasiz va uni nam sochlarga ildizlaridan boshlab uchlari tomonga qarab surtasiz. Shundan keyin sochlarni fen yordamida quritib olasiz.

8-layfxak. Sochlar uchun tartibsiz turmaklarni tanlang

Sochlarni qanchalik qattiq tortib turmak qilsangiz, ular shunchalik xunuk va hajmsiz koʻrinadi. Shuning uchun tartibsizdek koʻrinadigan soch turmaklariga koʻproq eʼtibor bering. Yoyilgan yoki yigʻib olingan turmakdan soch tolalari tashqariga chiqib tursa, turmak ham hajmdor boʻlib koʻrinadi. Lekin, maxsus vositalarni qoʻllamagan holatda bunday natijaga erishib boʻlmaydi. Sochingizni turmaklashda sizga quruq shampun yordam beradi.

Sochlaringizni jingalak qilib olishingiz ham mumkin. Yirik yoki mayda koʻrinishdagi jingalak tolalar tekislangan sochlarga nisbatan hajmdor koʻrinadi.

• Foydali
• qiziqarli