Qandolatchi Lara Meyson qo‘shiqchi Teylor Svift shakli va haqiqiy o‘lchamidagi tort tayyorladi. Bu haqda “The Guardian” xabar berdi.

Mazali haykalda Tеylor Amerika milliy futbol ligasining Super Bowl kubogini ushlab turgan holatda tasvirlangan. Egnidagi qizil forma qo‘shiqchining qallig‘i – Trevis Kelsi o‘ynaydigan futbol jamoasiga tegishli.

Qandolatchi tortni pishirishi uchun 38 soat va 130 kg turli masalliq sarf qilgan. Uning so‘zlariga ko‘ra, Lara Meyson bunday katta hajmdagi tortlar yaratishni yaxshi ko‘radi. Ilgari u Grinch filmi qahramonidan xuddi shunday tarzda tort pishirgan.

“Men doim Teylor Sviftga atab uning shaklida tort pishirishni istar edim, chunki so‘nggi 5 yil ichida u deyarli har bir tanlov va nominatsiyalarda faxrli birinchi o‘rinni egallab kelmoqda. Men uni juda yaxshi ko‘raman, uning qo‘shiqlari va zamonaviy ayollar uchun munosib namuna ekanini qadrlayman. Bundan tashqari, men “Kansaz-siti-chifs” futbol jamoasiga ham muxlislik qilaman va tortda buni ham ifodalashni lozim topdim”, – deydi Meyson.

Qayd etilishicha, qandolatchining olti yoshli egizak qizlari uning ishidan juda mamnun. “Bizning onamiz Teylor Sviftning tortini tayyorlagan deb, xursand bo‘lishdi qizlarim”, – qo‘shimcha qildi Meyson.

• Qo‘shiqchi
• Tort