O‘zbekiston Ekologiya vazirligi rahbari maslahatchisi Rasul Kusherbayev Rossiya Tashqi ishlar vazirligi rasmiy vakili Mariya Zaxarovanining 6-sinf o‘quvchisini kaltaklash voqeasidan keyin “rasmiy tushuntirishlar” talab qilganiga javob sifatida uni O‘zbekistonda bo‘lishi nomaqbul deb topilgan xorijliklar ro‘yxatiga kiritishni taklif qildi. 

“Biz biror marta ham Rossiya maktablarida bo‘layotgan ishlarga aralashmaganmiz. Chunki bu mutlaq Rossiyaning o‘z ichki ishi. 

Shu jihatdan Rossiya Tashqi ishlar vazirligi vakili Mariya Zaxarovani Toshkentdagi maktab voqeasiga burnini tiqib, O‘zbekistonning ichki ishlariga aralashayotgani shunchaki bir munosabat bilan o‘tib ketadigan voqea emas. 

Afsuski, tilidan zahar tomishdan u yog‘iga o‘tmaydigan Zaxarovaning boshqa xalq va mamlakatlar ichki ishlariga aralashishi birinchi bor emas.

Qolaversa, yaqinda O‘zbekistonni bosib olish haqida aytgan rossiyalik siyosatchining harakatlarini izohlashda ham Zahar xonim O‘zbekistonni kamsitgan edi.

Shu bois, yaqinda Senat qabul qilgan qonunga asosan, Zaxarovani “O‘zbekistonda bo‘lishi nomaqbul deb topilgan chet el fuqarolari va fuqaroligi bo‘lmagan shaxslar ro‘yxati”ga kiritishning ayni vaqti. Ro‘yxatni undan boshlash kerak. Toki, bu shaxs o‘zining haqoratomuz, shovinistik bayonotlari javobsiz qolmasligini real his qilsin”, — deya javob qaytardi Rasul Kusherbayev.

Eslatib o‘tamiz, bir necha kun avval internet va OAVda Toshkentda rus tilidan dars berishni so‘ragani uchun kaltaklangan bola tasvirlangan video tarqaldi.

Shu holat bo‘yicha Mariya Zaxarova Rossiya tomoni O‘zbekistondan “rasmiy tushuntirishlar” so‘raganini aytgan edi.

• Mariya Zaxarova
• Rasul Kusherbayev
• Rossiya