Tojikiston hukumati mamlakatda istiqomat qilayotgan afg‘on qochqinlarini ommaviy deportatsiya qilish faktini rasman tasdiqladi. Bu haqda Milliy xavfsizlik davlat qo‘mitasi Chegara qo‘shinlari xabar berdi.

Idoraning ta’kidlashicha, “mintaqa va dunyodagi murakkab siyosiy-iqtisodiy vaziyat” tufayli mamlakatga chet elliklar oqimi sezilarli darajada oshgan. Shu sababli ko‘plab muhojirlar Tojikistonda noqonuniy yashayotgani yoki belgilangan qoidalarni buzayotgani aniqlangan.

Tekshiruvlar davomida giyohvand moddalarning noqonuniy aylanishi, ekstremizmni targ‘ib qilish, qochqin maqomini olish uchun hujjatlarni qalbakilashtirish, Tojikistondan tranzit hudud sifatida foydalanish holatlari aniqlangan. Shu munosabat bilan, qonunbuzarlarni chiqarib yuborish choralari ko‘rilmoqda.

Tojikistondagi afg‘on muhojirlari qo‘mitasi rahbari Musavvir Bahoduriyning so‘zlariga ko‘ra, afg‘onlar “nomaqbul soqol qo‘yish, noo‘rin xatti-harakatlar, spirtli ichimliklar iste’mol qilish, mojarolarda ishtirok etish, ijtimoiy tarmoqlarda siyosiy fikrlar bildirish, diniy targ‘ibot olib borish, hujjatsiz ishlash va fuqarolarni haqorat qilish” kabi sabablar bilan chiqarib yuborilmoqda.

Shu bilan birga, Bahoduriyning o‘zi iyul oyidagi ommaviy deportatsiya haqidagi xabarlarni asossiz deb atagan. U “qochqinlardan hech biri qo‘mitaga rasman murojaat qilmaganini” aytgan.

Rasmiy statistika (UNHCR — BMTning Qochqinlar bo‘yicha Oliy komissarligi) 2024-yil oxirida Tojikistonda taxminan 9 900 nafar ro‘yxatga olingan afg‘on qochqinlari mavjudligini ko‘rsatadi. Biroq ko‘plab manbalar hozirda bu raqam 10 000–13 000 atrofida yoki undan ham yuqori bo‘lishi mumkinligini ta’kidlamoqda.

• Afg‘oniston
• Deportatsiya
• Tojikiston