Afg‘onistonda hokimiyatni qo‘lga olgan “Tolibon” harakati oliy ta’lim muassasalarida navbatdagi cheklovni joriy etdi. Unga ko‘ra, universitet o‘qituvchilari va to‘rtinchi darajadan past lavozimdagi xodimlarga ish vaqtida smartfon ishlatish taqiqlanadi. Bu haqda Afghanistan International nashri mamlakat Oliy ta’lim vazirligining rasmiy hujjatiga tayanib xabar berdi.

Vazirlik hujjatida ta’kidlanishicha, smartfonlardan foydalanish “ishni murakkablashtiradi va chalg‘itadi”. Shu sababli universitetlar va kollejlarda professor-o‘qituvchilar, shuningdek, to‘rtinchi darajadan past bo‘lgan ma’muriy xodimlarga ish vaqtida telefon olib kirish va undan foydalanish qat’iyan taqiqlanadi. Bundan tashqari, to‘rtinchi darajadan yuqori lavozimdagilarga ham smartfonlardan foydalanishni asta-sekin kamaytirish tavsiya etilgan.

“Ilm ahli universitet ichida smartfondan foydalanish huquqiga ega emas”, – deyiladi “Tolibon” Oliy ta’lim vazirligining rasmiy bayonotida.

• Afg‘oniston
• Oliy ta'lim
• O‘qituvchi
• Smartfon
• taqiq