Tongda badantarbiya bilan shugʻullanishni oson ish deb boʻlmaydi. Buning uchun avval uygʻonib olish, keyin esa oʻzingizni harakat qilishga majburlashingiz kerak. Shuning uchun ham tongda bajariladigan mashqlar oddiy, yoqimli hamda yodda qolarli boʻlishi lozim. Kun davomida sizga tetiklik bagʻishlaydigan va tonggi qahva oʻrnini bosa oladigan ushbu mashqlarni har kuni bajarsangiz, foydasini koʻp oʻtmay sezasiz.

1. Oʻzingizni quchoqlang!

Har qanday badantarbiya oddiy va oson mashqlardan boshqalanishi kerak. Bu vaqtda keskin harakatlar qilish mumkin emas. Eng avvalo, qulay holatni egallang, ikkita qoʻlingizni yelka balandligida koʻtaring. Keyin esa qoʻllaringizni yelkalaringiz ustiga qoʻyib, oʻzingizni quchoqlayotgandek harakat qiling va avvalgi holatga qayting. Ushbu mashqni 30 soniya davomida bajarish tavsiya etiladi.

2. Joyimizda yuguramiz!

Yugurish – eng yaxshi va foydali kardio mashqlardan biri hisoblanadi. Joyingizda turgan holatda 40 soniya davomida yugurish tanaga tetiklik bagʻishlaydi.

3. Sakrash mashqi

Bitta joyda turgan holatda imkoniyatingizdan kelib chiqib, 50-100 marta sakrash mashqini bajaring. Bunda oʻta baland sakrashingiz shart emas, mashqni xotirjamlik bilan bajarsa ham boʻladi. Sakrash mashqlari tetiklashishga yordam berish bilan birga shishlarning oldini oladi, sellyulitga qarshi kurashadi.

4. Oʻtirib turish

Oʻtirib turish – tana uchun eng foydali mashqlardan biridir. Tongda 20-30 marta oʻtirib turish charchoqqa sabab boʻlmaydi, aksincha sizni yanada harakatchan va chidamliroq boʻlishga oʻrgatadi.

5. Raqsga tushamiz!

Shoʻx musiqaga raqs tushish sizni achchiq qilib damlangan qahvadan ham tezroq tetiklashtira oladi. Shuningdek, tongda oʻzingiz sevgan musiqaga oʻyinga tushish kayfiyatingizga ham ijobiy taʼsir qiladi!

• Foydali
• salomatlik