24-dekabr kuni Toshkentda O‘zbekiston va Misr o‘rtasidagi hukumatlararo komissiyaning navbatdagi yig‘ilishi va O‘zbekiston-Misr biznes-forumi bo‘lib o‘tadi.

Tadbirlarda O‘zbekiston Respublikasi investitsiyalar, sanoat va savdo vaziri Laziz Kudratov hamda Misrning rejalashtirish, iqtisodiy rivojlantirish va xalqaro hamkorlik vaziri Raniya Al-Mashat ishtirok etishi kutilmoqda.

Forumga ikki mamlakat ishbilarmon doiralarining 100 dan ortiq vakillari tashrif buyurishadi. Xususan, Misr biznesini El Sewedy Electric, Hassan Allam Holding, ACDIMA, EPICO, Nile sugar, Badawy Group, Masriya machine, Ebtkarat Smart Systems, Solyphar, Al Farouk for Import & Export va boshqa kompaniyalar taqdim etadi.

Shuningdek, O‘zbekiston va Misrning iqtisodiy salohiyati, hamkorlikni rivojlantirishning istiqbolli yo‘nalishlari, G2B va B2B muzokaralari taqdim etiladi. Unda tadbirkorlar hamkorlikning mumkin bo‘lgan yo‘nalishlarini batafsil muhokama qilishlari mumkin.

Forum yakunida iqtisodiyotning turli tarmoqlarida qo‘shma tashabbuslarni amalga oshirish va mintaqalararo hamkorlikni rivojlantirish bo‘yicha bir qator ikki tomonlama hujjatlarni imzolash marosimi bo‘lib o‘tadi.

• Biznes
• Forum
• Misr
• O‘zbekiston
• Toshkent