Samarqand viloyati Tayloq tumani hokimligi “Toyloqtumangaz” gaz taʼminoti korxonasida yuz bergan baxtsiz hodisadan 7 kun o‘tib “tilga kirdi”.

Hokimlik o‘z munosabatida joriy yilning 18 mart kuni soat 15:00larda “Toyloqtumangaz” gaz taʼminoti bo‘limi elektron gaz hisoblagich muhandisining xizmat xonasida portlash sodir bo‘lgani, natijada 2 nafar xodim hamda 2 nafar murojaat bilan kelgan fuqarolar tan jarohati olganini tasdiqlab, hodisaga konditsionerning portlashi sabab bo‘lganini maʼlum qilgan. 

“Dastlabki maʼlumotlarga ko‘ra mazkur xonada o‘rnatilgan va ishlab turgan “Artel” rusumli konditsioner chaqnashi natijasida xonada portlash sodir bo‘lganligi aniqlangan. Voqea joyidan nosoz holatda kelgan bir dona konditsioner ashyoviy dalil sifatida olingan”, – deyiladi hokimlik munosabatida.

Shuningdek, tan jarohati olgan fuqarolarning ahvoli yaxshi ekanligi ham maʼlum qilingan.  

Hokimlik, shuningdek, mazkur holat bo‘yicha “asoslantirilmagan xabarlar tarqalayotgani” haqida ogohlantirib, fuqarolardan aniq va ishonchli manbalardan axborot olishlarini so‘ragan.

Shu o‘rinda ayrim savollar paydo bo‘ladi: 4 kishini jarohatlagan baxtsiz hodisaga nega o‘z vaqtida (toki internet nashrlarida eʼlon qilinmagunicha) rasmiy munosabat bildirilmadi?

Xabardor.uz tahririyatiga kelib tushgan murojaatda xonada gaz hidi sezilgani haqida gap borgan edi. Shunda baxtsiz hodisaga konditsionerning portlashi sabab bo‘lganmi yoki ishlab turgan konditsioner xonada to‘plangan gaz hisobiga portlaganmi?

Nega portlash bo‘lgan xona tezda taʼmirlab qo‘yildi? Yoki nega korxona mutasaddilari jabrlanganlardan hech qayerga murojaat qilmasliklarini so‘radi?..

Hokimlik hodisa xronologiyasini keltirish bilan birgalikda yuqoridagi savollarga ham javob bersa, yaxshi bo‘lar edi...   

• Samarqand
• Tayloq