Kecha, 9-sentyabr kuni Turkiyaning Trabzon shahrida O‘zbekiston faxriy konsulxonasi ochildi. Bu haqda Oʻzbekistonning Turkiyadagi elchixonasi xabar berdi.

Unga ko‘ra, faxriy konsulxona Trabzon viloyat hokimligi (vakillik) binosi qarshisida joylashgan.

Shu paytgacha bunday vakolatxona mamlakatning Bursa, Adana, Antaliya viloyatlarida bo‘lgan.

Yangi faxriy konsulxona tegishli hududdagi fuqarolar huquqlari hamda qonuniy manfaatlarini himoya qilishga ko‘maklashish barobarida, Trabzon va mamlakatimiz viloyatlari o‘rtasidagi savdo-iqtisodiy hamda madaniy-gumanitar hamkorlikni yangi bosqichga olib chiqadi.

Shuningdek, O‘zbekistonning Trabzon shahridagi Faxriy konsulxonasi ochilishi munosabati bilan qabul marosimi tashkil etilib, mamlakatimizda so‘nggi yillarda amalga oshirilgan tub islohotlar, savdo-iqtisodiy va turizm sohalaridagi hamkorlik imkoniyatlari haqida keng qamrovli taqdimot mehmonlar e’tiboriga havola etildi.

Faxriy konsullik — bu davlatlar o‘rtasidagi savdo, madaniy va diplomatik aloqalarni rivojlantirish maqsadida ochiladigan vakolatxona.

• Konsullik
• Turkiya