Koʻpchilik insonlar uchun tuz oddiy ziravor, xolos. Biroq tajribali uy bekalari undan qanday foydalanish (kir yuvish, dogʻlarni ketkazish)ni yaxshi bilishadi. Bundan tashqari, oddiy tuz kasallikni davolash vositasiga ham aylanishi mumkin. Bugun biz tuzdan siz bilmaydigan tarzda foydalanish yoʻllarini oʻrgatamiz.

Gaz duxovkasidagi noxush hid

Agar duxovkada avval tayyorlangan taomning oʻtkir hidi saqlanib qolgan boʻlsa, dolchinli tuz yordam beradi. Dolchin va tuzni duxovka patnislariga saxiylik bilan seping va qizdirib, bir necha daqiqa kuting. Jarayondan soʻng, tuzli aralashmani chiqindi chelagiga agʻdaring, duxovkani esa yaxshilab artib yuboring.

Kumush taqinchoqni tozalash

Sirka va tuz aralashmasi kumushni tozalovchi eng yaxshi vosita hisoblanadi. Kumushdan yasalgan taqinchoq yoki qoshiq-sanchqilarni shu suyuqlikda 15-20 daqiqa ivitib qoʻyib, quruq, yumshoq mato bilan arting va oqib turgan suvda chaying. Biroq qorayib qolgan kumush taqinchoqni bu tarzda tozalab boʻlmaydi.

Kir yuvish

Agar siz rangli kiyimlarni aralashtirib yuvmoqchi boʻlsangiz, suvga ozgina yirik tuz qoʻshib yuboring. Shunda kirlarning tiniq rangi uniqib qolmaydi.

Tish ogʻrigʻi

Buvilarimiz avjiga chiqqan tish ogʻrigʻini bir stakan suvga ikki oshqoshiq tuz qoʻshib chayish orqali qoldirgan ekan. Ayni shu aralashma bilan tomoq va ogʻiz boʻshligʻi kasalliklarini (stomatitdan tashqari) ham davolash mumkin.

Oyoqni vanna qilish

Koʻp terlaydigan oyoqlarni tuzli vanna yordamida davolash mumkin. Kechqurun, uyqudan avval oyogʻingizni 10-15 daqiqa tuzli suvga tiqib turing. Bu muolajani har kuni takrorlash mumkin. Tuz terini quritib, yogʻ bezlari faoliyatini susaytiradi.

Tuzli skrab

Yuqorida aytib oʻtganimizdek tuz terini quritib, undagi oʻlgan hujayralarni chiqarib tashlashga yordam beradi. Demak, undan ajoyib skrab tayyorlash mumkin. Bunday skrabni hosil qilish uchun mayda tuzga limon sharbati va zaytun yogʻi qoʻshiladi. Tanaga samarali skrab tayyorlash uchun esa biroz qayta ishlangan qahva quyqasiga tuz, kokos yoki zaytun yogʻi qoʻshish lozim.

Quvurdan suv ketmay qolsa

Agar qoʻlingizda quvurni tozalash uchun biror vosita boʻlmasa, tiqinlarni oddiy tuz yordamida ham ketkazish mumkin. Shunchaki quvur ogʻziga ikki qoshiq tuz sepib, orqasidan qaynoq suv quyib yuboring. Ikki daqiqadan soʻng suv ketishi yaxshilanadi.

Pol va oynalarni yuvish uchun

Tabiiy vositalardan foydalanadiganlar tuzning tozalovchi va dezinfeksiyalash xususiyati haqida yaxshi bilishadi. U tashqi yuzani tozalash bilan birga xona havosini ham musaffolashtiradi. Kimyoviy vositalarga allergiyasi borlar va yosh bolali onalarga pol va oynalarni tuz bilan tozalash tavsiya etiladi. Shunchaki 2 oshqoshiq tuzni uch litr suvga solib, tozalashga kirishing.

Dazmol ostidagi dogʻ

Tuz yordamida dazmol ostida qolgan dogʻni osonlikcha ketkazish mumkin. Buning uchun yirik tuzni mato ustiga sepib, dazmolni bir necha bor ustidan yurgizing.

Yogʻli tovani tozalash

Judayam yogʻli tovani tozalamoqchi boʻlsangiz, tuz sizga yordam beradi. Uni tova tubiga qalin qilib seping va ozgina suv qoʻshib, olovda 5-10 daqiqa ushlang. Keyin esa oqib turgan issiq suvda osonlik bilan chayib yuborishingiz mumkin.

Taxtakach kirlanganda

Taxtakach unda toʻgʻralgan barcha mahsulotning hidini oʻziga oladi. Shu bois ularni vaqti-vaqti bilan tozalab turish lozim. Buning uchun tuz va limondan foydalaning. Bir boʻlak limon boʻlagi bilan taxtakach ustiga sepilgan tuzni ishqalab chiqing. 10-15 daqiqa qoldirib, soʻng yuvib tashlang.

Chumolilarga qarshi kurashish

Qoʻl ostingizda hasharotlarga qarshi kurashadigan biror vosita boʻlmagan paytda siz oddiygina tuz yordamida chumolilarga qarshi kurashishingiz mumkin. Tuzni uyalar oldiga, tokcha, burchak-burchaklarga sepib chiqing.

Tuxum yorilib ketsa

Tuxumlarni taxlayotganingizda yerga tushib, boʻlinib ketdimi? Ustiga darhol tuz sepib, 5 daqiqaga qoldiring, keyin quyuq massani yigʻishtirib olish osonlashadi.

Begona oʻtlarni tozalash uchun

Tuz faqatgina oshxonada emas, tomorqada ham yaxshigina yordam beradi. Uning yordamida hatto eng qalin oʻtlarni ham tozalash mumkin. Dastlab oʻtlar ustiga 9 foizli sirka quyib chiqing va ustidan tuz ham seping. Eng muhimi, meʼyoridan oshirib yubormaslik. 

• Foydali
• Tavsiya