Rossiyaning Vladikavkaz shahrida 17-aprel kuni chiqindi konteynerlarini yuklash jarayonida yuz bergan portlash oqibatida 46 yoshli O‘zbekiston fuqarosi voqea joyida halok bo‘ldi. Portlash Vladikavkazdagi Internatsionalnaya ko‘chasi va Partizanskiy tor ko‘chasi kesishgan hududda sodir bo‘lgan. Marhumning hamkasblari uning besh nafar farzandi borligini ma’lum qilgan.

Hozirda voqea joyida tezkor xizmatlar va huquqni muhofaza qiluvchi organlar ishlamoqda. Hodisaning barcha tafsilotlari aniqlanmoqda. Rossiya tergov organlari tomonidan Jinoyat kodeksining 109-moddasi 1-qismi (ehtiyotsizlik oqibatida o‘limga sabab bo‘lish) bo‘yicha jinoyat ishi qo‘zg‘atilgan.

Dastlabki ma’lumotlarga ko‘ra, portlash chiqindi konteynerida bo‘lgan portlovchi xavfli buyumlar sabab yuzaga kelgan bo‘lishi mumkin. Sapyorlar tomonidan chiqindi tashuvchi transport vositasi tekshirilib, keyinchalik maxsus poligonga olib chiqilishi rejalashtirilgan.

Shimoliy Osetiya — Alaniya respublikasi rahbari Sergey Menyaylo aholidan yong‘inga xavfli buyumlarni chiqindi konteynerlariga tashlamaslikni, ularni maxsus xizmatlar orqali topshirishni so‘radi.