Bugun, 23-iyun kuni O‘zbekiston Tashqi ishlar vaziri vazifasini bajaruvchi Vladimir Norov Argentina Respublikasining mamlakatimizdagi Favqulodda va muxtor elchisi etib tayinlangan (qarorgohi Moskva shahrida) Eduardo Antonio Zuaynni qabul qildi. Bu haqda vazirlik matbuot xizmati xabar berdi.

Qayd etilishicha, suhbat chog‘ida O'zbekiston-Argentina hamkorligining bugungi holati va rivojlanish istiqbollari muhokama qilindi.

Tomonlarning konstruktiv siyosiy muloqotni faollashtirishga tayyorligi ta’kidlandi. O‘zaro aloqalarning shartnomaviy-huquqiy asosini kengaytirish, parlament diplomatiyasini rivojlantirish, vazirliklararo maslahatlashuvlarni o‘tkazish, shuningdek, xalqaro institutlar doirasidagi sa’y-harakatlarni muvofiqlashtirish bo’yicha takliflar ko‘rib chiqildi.

Shuningdek, ikki mamlakat hududida o‘tkaziladigan kinofestivallar va boshqa tadbirlarda ishtirok etish, kadrlar tayyorlashda oliy ta’lim muassasalari aloqalarini kengaytirish, sport sohasidagi munosabatlarni rivojlantirish, sayyohlik almashuvlarini jadallashtirish masalalarini o‘rganib chiqishga tayyorligi ma’lum qilindi.

• Argentina
• Tashqi ishlar vazirligi