Xitoyning markaziy qismidagi Pingdingshan shahrida (Xenan viloyati) ko‘mir konida baxtsiz hodisa sabab sakkiz kishi bedarak yo‘qolgan. Bu haqda TASS ma’lum qildi.

Shahar favqulodda vaziyatlar boshqarmasining so‘nggi ma’lumotlariga ko‘ra, konda qolgan 45 kishidan 8 nafari halok bo‘lgan, yana 8 nafari bedarak yo‘qolgan. Boshqa barcha odamlar esa qutqarilgan.

“Voqea sodir bo‘lgan paytda 425 nafar konchi yer ostida bo‘lgan. Qutqaruv ishlari davom etmoqda. Kon boshqarmasining mas’ul xodimlari politsiya tomonidan qo‘lga olindi, tergov harakatlari olib borilmoqda” – deb yozadi Sinxua.

Favqulodda holat juma kuni mahalliy vaqt bilan soat 14:55da (Moskva vaqti bilan 09:55) yuz bergan.

Shuningdek, voqeaga ventilyatsiya tizimining tashqi qismida gaz va ko‘mir chiqishi sabab bo‘lganligi aytilmoqda.

• Favqulodda holat
• Halokat
• Xitoy