G‘anemiy namoyishlarni bostirishda va ko‘plab fuqarolarni hibsga olishda ishtirok etgan deyilmoqda.

Damashq viloyatidagi Ichki xavfsizlik qo‘mondonligi Terrorizmga qarshi kurash boshqarmasi bilan hamkorlikda Hasaka viloyati yaqinida o‘tkazgan qo‘shma operatsiyasi natijasida 2010–2014-yillarda Harbiy xavfsizlik boshqarmasi boshlig‘ining o‘rinbosari lavozimida ishlagan sobiq general-mayor Rateb Ali G‘anemiy hibsga olindi. Bu haqda Suriya Ichki ishlar vazirligiga tayanib, SANA davlat axborot agentligi xabar berdi.

Ichki ishlar vazirligi o‘zining Telegram kanalida ma’lum qilishicha, dastlabki tergovlar G‘anemiyning bir qator xavfsizlik lavozimlarida ishlaganini ko‘rsatdi. Jumladan, u Sa’sa bo‘limi rahbari o‘rinbosari bo‘lishidan avval Hasaka shahridagi Harbiy xavfsizlik bo‘limiga rahbarlik qilgan. U ushbu lavozimlarga Bashar al-Asad tomonidan bevosita tayinlangan.

Vazirlikning qo‘shimcha qilishicha, mazkur davrda G‘anemiy namoyishlarni bostirishda, ko‘plab fuqarolarni hibsga olishda, shuningdek, asosiy huquq va erkinliklarning buzilishi bilan bog‘liq repressiv choralarni amalga oshirishda ishtirok etgan.

Bu harakatlar fuqarolarning asosiy huquq va erkinliklarining qo‘pol ravishda buzilishiga olib kelgan.

Asad rejimi ag‘darilganidan keyin, general kurdlarning YPG/SDF qurolli tuzilmalariga qo‘shilib olgan deya taxmin qilinmoqda.

• Jahon
• Suriya