Yaponiyaning Kioto universiteti olimlari koronavirus zarrasi bilan toʻqnash kelgan holatda ultrabinafsha ostida oʻzidan nur taratuvchi tibbiy niqob yaratishdi. Ushbu natijaga niqobdagi filtrga maxsus fluoretsent boʻyogʻi bilan ishlov berish usuli orqali erishilgan.

Boʻyoq tarkibida koronavirusga qarshi taʼsir koʻrsatish imkoniyatiga ega boʻlgan va tuyaqush tuxumdan olingan antitanachalar mavjud. Gap shundaki, joriy yilning fevral oyida tadqiqotchilar urgʻochi tuyaqushlarning organizmiga koronavirusning nofaol va xavfsiz namunasini kiritishgan. Buning natijasida tuyaqushlar qoʻygan tuxumdan katta miqdordagi antitanachalar ajratib olingan.

Tadqiqotlar jarayonida koronavirusni yuqtirib olgan 32 nafar bemor ishtirok etgan.

Maʼlum bemorning koronavirusga chalingan yoki yoʻqligini bilish uchun u taqib yurgan niqobdagi filtrni ajratib olish va uni koronavirusga qarshi antitanachalarga ega boʻlgan fluoretsent boʻyogʻiga botirib olish kifoya. Agar tibbiy niqob yuzasida koronavirus zarralari mavjud boʻlsa, filtr ultrabinafsha chirogʻi ostida nur sochishni boshlaydi.

• koronavirus
• qiziqarli
• salomatlik
• tadqiqot