“Siti” bu o‘yinga Angliya Kubogi 4-bosqichida “Leyton” ustidan qozonilgan g‘alaba bilan kelayotgan bo‘lsa, “Real” La Liga doirasida Madridning boshqa bir jamoasi “Atletiko” bilan kuch sinashib, durang qayd etgan holda yetib keldi.

Ushbu bellashuvga qadar ikkala jamoada ham jiddiy yo‘qotishlar bor edi. Biroq, “shaharliklar” safidagi bir qator futbolchilar safga qaytganligi ma’lum bo‘ldi. Ulardan Jon Stounz va Ruben Diash jarohatidan to‘liq forig‘ bo‘lgan. “Qaymoqranglilar”da esa yo‘qotishlar ustiga yo‘qotish. So‘ngi xabarlarga ko‘ra, Manchesterdagi o‘yin uchun qaydnomaga kiritilgan himoyachi Lukas Vaskes ham mazkur bellashuvni jarohat sabab o‘tkazib yuborishi oydinlashdi.

Jamoalar tarkibidagi umumiy yo‘qotishlarga nazar solsak.

 “Real Madrid”: Lukas Vaskes, David Alaba, Eder Militao, Antonio Ryudiger, Dani Karvaxal. Ro‘yxatda sanab o‘tilgan futbolchilarning barchasi himoya vakillari hisoblanadi.

“Manchester Siti”: Natan Ake, Rodri, Jeremi Doku, Niko Gonsales.

Jamoalar o‘rtasidagi o‘zaro o‘yinlar jami 14 tani tashkil qiladi. Shundan 4 o‘yinda “Manchester Siti”ning g‘alabasi qayd etilgan, “Real” hisobida esa 3 ta g‘alaba mavjud va yana 5 ta bahsda kuchlar teng kelgan.

Bugunning asosiy o‘yini va so‘ngi yillarda haqiqiy dramaga aylanayotganligi uchun ushbu bahsni butun dunyo futbol muxlislari intiqlik bilan kutayotgan bo‘lsa, o‘zbek futboli muxlislari uchun boshqa bir jihat o‘yinni tomosha qilish uchun katta qiziqish uyg‘otmoqda. Ha, “Siti” safida debyut mavsumini o‘tkazayotgan va jamoaning so‘nggi o‘yinida gol urishga erishgan o‘zbekistonlik himoyachi Abduqodir Husanovning ham bugun tarixiy bahsda maydonga tushishi kutilmoqda.

Eslatib o‘tamiz, ushbu bahs 12-fevralga o‘tar kechasi Toshkent vaqti bilan soat 01:00 da start oladi.

Ma’lumot uchun: Yevropa chempionlar ligasida “Liverpul”, “Barselona”, “Arsenal”, “Inter”, “Atletiko”, “Bayer”, “Lill” va “Aston Villa” klublari 1/8 final bosqichiga to‘g‘ridan-to‘g‘ri yo‘l olgan.

• Abduqodir Husanov
• Futbol
• Manchester Siti
• Real
• YeChL