Kecha tunda futbol muxlislari ajoyib dramatik uchrashuv guvohi bo‘lishdi. Chempionlar Ligasida “Real Madrid” va “Manchester Siti” o‘rtasidagi bahs chindan ham klassik to‘qnashuvga aylandi. O‘yin davomida maydonda nafaqat texnik mahorat, balki bosh murabbiylar taktik jangi ham ketdi.

“Shaharliklar” o‘yinni kuchli pressing va aniq uzatmalar bilan boshladi. Bu taktik o‘ylanma 19-daqiqaga kelib o‘z samarasini berdi. Erling Holand aniq zarbasi bilan hisobni ochdi, 1:0. Gol “Man Siti”ga nafaqat hisobda, balki ruhiy jihatdan ham muhim ustunlik berdi.

Madrid jamoasi birinchi bo‘limda o‘z o‘yinini topishda ancha qiynaldi, darvoza tomon ko‘plab zarbalar berilgan bo‘lsa-da, hisob o‘zgarmadi. Ikkinchi taymda Anchelotti taktikani biroz o‘zgartirdi. “Real” himoyani kuchaytirib, tezkor qarshi hujumlarga tayanishni boshladi. Nihoyat, 59-daqiqada Dani Sebalosning ajoyib uzatmasidan so‘ng Mbappe hisobni tenglashtirdi. Shunga qaramasdan mezbonlar bir necha o‘zgarishlar qilib, oldinga borishda davom etaverdi. Shunday hujumlarning birida Fil Fodenga bo‘lgan qo‘pollik uchun uchrashuv bosh hakami Turpen ko‘plab muxlislar nazdida bahsi vaziyat uchun Kurtua darvozasi tomon penalti belgiladi. 78-daqiqada Holand penaltidan aniq zarba yo‘llab, yana jamoasini oldinga olib chiqdi. Ammo, “qirollik klubi” har doimgidek so‘nggi daqiqalargacha oldinga boraverdi. O‘yin asosiy vaqti yakunlanishiga 5 daqiqa vaqt qolgan va “Man Siti” g‘alabaga juda yaqin edi, ammo madridliklar hech qachon taslim bo‘lmasliklarini yana bir bor isbotlashdi. Rodrigo o‘rniga maydonga tushgan Brahim Diaz 86-daqiqada, ilk hujumidanoq gol urdi va hisobni 2-2 ko‘rinishiga keltirdi. Barchaning fikricha o‘yin durang bilan yakunlanadigandek edi. Ammo, “kambekshunos” “Real Madrid” bunga ko‘nmadi uchrashuv asosiy vaqtiga qo‘shib berilgan 3 daqiqaning ikkinchisi o‘tib borayotgan bir vaqtda angliyalik yarimhimoyachi Jud Bellengem o‘yinga nuqta qo‘ydi. Umumiy hisob 2:3 “Real” foydasiga.

Ma’lumot uchun, ushbu jamoalar o‘rtasidagi javob o‘yini “Bernabeu”da 20-fevralga o‘tar kechasi Toshkent vaqti bilan soat 01:00 da bo‘lib o‘tadi. Chempionlar Ligasi bu yil ham bizni kutilmagan voqealar bilan hayratga solishda davom etadi!

Shuningdek, tunda YeChL doirasida yana 3 ta uchrashuv bo‘lib o‘tdi. “Yuventus” o‘z uyida “PSV” ustidan 2:1 hisobidagi irodali g‘alabaga erishgan bo‘lsa, “PSJ” Dembelening dubli evaziga “Brest”ni yirik 3:0 ko‘rinishida yengdi. Portugaliyada “Sporting” mehmoni bo‘lgan “Borussiya Dortmund” ham 0:3 hisobida zafar quchdi.

Tayyorladi: Azimjon Shodmonov

• Borussiya
• Chempionlar Ligasi
• Manchester Siti
• PSJ
• Real