Angliya terma jamoasi Yevro-2020 guruh bosqichining so‘nggi, uchinchi turidan o‘rin olgan Chexiyaga qarshi o‘yinda kichik, 1:0 hisobida g‘alaba qozondi. Uchrashuvdagi yagona gol 12 daqiqada Rahem Sterling tomonidan kiritildi. Yakunda, inglizlar 3 tur natijasiga ko‘ra 7 ochko jamg‘arib keyingi bosqichga yo‘l olishdi.

Garet Sautgeyt jamoasi o‘tkazilgan uchta o‘yinda ikkita gol urdi xolos. Bu Yevropa chempionati tarixida guruh bosqichini birinchi o‘rin bilan yakunlagan jamoalar ichida eng yomon ko‘rsatkich sifatida qayd etildi.

Shu bilan birga, inglizlar bugungacha Yevropa chempionati guruh bosqichini o‘z tarixida uchunchi bor g‘oliblik bilan yakunlashdi. Ilgari ular 1996 va 2012-yillarda xuddi shunday ko‘rsatkich qayd etishgan edi.

E’tiborlisi, Angliya termasi kam gol urish bilan birga, o‘z darvozasidan bitta ham to‘p o‘tkazib yubormadi. Jamoa Xorvatiya va Chexiya bilan 1:0, Shotlandiya bilan esa 0:0 hisobini qayd etdi.