Inson o‘zining sochini o‘zi kesolsa, qanday yaxshi-ya? Sartaroshga xarajat qilishning ham, vaqt ajratishning ham keragi qolmaydi. Ammo buni qanday bajarsa bo‘ladi? Bugungi maqolamizda italiyalik stilist Alfonso Kampanya, erkaklarga o‘z sochini o‘zi kaltalatishni o‘rgatadi va bu jarayon olti bosqichni o‘z ichiga oladi. 

1-bosqich
Sochni olish uchun avvaliga kerakli asboblar tayyorlab olinadi. Buning uchun sizga ikkita ko‘zgu, taroq, o‘tkir qaychi, soch oladigan apparat (agar apparat bo‘lmasa, soch ustarasi) kerak bo‘ladi.

2-bosqich
Ko‘zgular bir-biriga qarama-qarshi holda, orasi bir metr uzoqlikda qo‘yiladi. Ikkala ko‘zguning o‘rtasiga turib olish kerak. Oldinda turgan ko‘zguda yuzni, orqada turgan ko‘zgu bilan boshning orqa qismini, bemalol, ko‘ra olasiz.

3-bosqich
Purkagichga suv olinadi, soch ho‘llanadi. Nam sochlar uch qismga: boshning tepa va ikki yon tomoni ajratib olinadi.

4-bosqich
Qaychi bilan boshning yon qismidagi soch oldindan orqaga, pastdan tepaga kesiladi. Barmoq yoki taroq orqali soch oralari ajratiladi va uchlari kesib olinadi. Keyingi qatorlar birinchi qatordagi sochlar bilan birga ushlanadi va ular bir tekis qilib kesiladi. Shu yo‘sinda boshning o‘rtasiga yetib olinadi. Bo‘yinga yaqinroq joylashgan sochlar kamroq kesilishi kerak.

5-bosqich
Boshning tepa qismidagi sochlar oldga taraladi, sochlar orasi ochiladi. Yon tomondagi sochlarning kesilishi kabi tepa sochlar ham kesiladi. Ammo ularni biroz kamroq kesish lozim. Chunki boshning tepa qismida sochlar uzunroq bo‘lgani yaxshi.
Sochlar tepa markazidan peshona tomonga qarata kesib chiqiladi.

6-bosqich
Soch ustarasi yoki mashinkasi bilan bo‘yin, yon tomondagi sochlar tekislab olinadi. Sochlar orasidan uzunroq soch tolasi chiqib tursa, qaychi bilan tekislanadi.