Moliya vaziri Jamshid Qo‘chqorov o‘zining Twitter’dagi sahifasida inflyatsiya darajasining yanvar oyi hisoblariga ko‘ra pasayganini ma’lum qildi.

Vazirga ko‘ra, yanvar oyida inflyatsiya – 0,6 foizni tashkil etdi. O‘tgan yil xuddi shu davrda – 1,5 foiz, 2018-yilning yanvarida – 2,7 foiz, 2017-yilning mos davrida esa 1,5 foiz bo‘lgan. 

“Inflyatsiyani jilovladik deyishga hali erta. Biz faqatgina inflyatsiya bilan kurashish mumkinligini ko‘rayapmiz, xolos”, deydi u.

Vazir shuningdek, inflyatsiya darajasini o‘tgan yilga nisbatan pasaytirish imkoniyatini ham ijobiy baholaydi: 

– Lekin inflyatsiyaga ta’sir etuvchi bir nechta nomonetar omillar hali ham neytralizatsiya qilinmagan. Ishlashimiz kerak, asosiysi - inflyatsiyani o‘tgan yilgiga nisbatan pasaytirish ehtimoli anchagina yuqori.

Eslatib o‘tamiz, avvalroq O‘zbekiston Respublikasi Markaziy banki inflyatsiya darajasini 2021-yilda 10 foizgacha pasaytirish hamda 2023-yilda 5 foiz darajadagi doimiy inflyatsion maqsadni (target) o‘rnatish yo‘li bilan pul-kredit siyosati mexanizmlarini bosqichma-bosqich inflyatsion targetlash rejimiga o‘tkaza boshlashi haqida ma’lum qilgan edi.

Shuningdek, joriy yilning 25-yanvar kuni Xalqaro press-klubning Prezident Murojaatnomasiga bag‘ishlangan sessiyasida Jamshid Qo‘chqorov joriy yilda O‘zbekistonda inflyatsiya darajasi past bo‘lmasligi mumkinligini ta’kidlagandi.
 
“2020-yil inflyatsiya past bo‘lishiga va’da bera olmaymiz. Buning iloji ham yo‘q. Ayniqsa, paxta va g‘allaga davlat “zakaz”i bekor qilinsa, paxta va g‘alla egasi yarmarkalarda o‘z narxini qo‘yadi. Bu esa narx-navo o‘sishiga olib keladi”, degan edi u.