Mazkur belgini bugun hamma ishlatadi, lekin uning nima uchun aynan “kuchukcha” deb nomlanishini deyarli hech kim bilmaydi. Aslida bu “tijoriy at”, ya’ni tijoriy belgi deb ataladi. Shuning uchun bu belgini biz kuchukcha deganimizda chet elliklar hayron bo‘lishadi. O‘zbekiston avvallari SSSR tarkibidagi  davlatlardan biri sifatida, rossiyaliklar qabul qilgan atama (“sobachka”)ni qo‘llagan. Aslida, mazkur belgi kompyuterlar chiqmasidan oldin buxgalteriya hujjatlari tayyorlanadigan yozuv mashinalarida mavjud bo‘lgan. 

“Kuchukcha” yoki “tijorat” belgisi ancha yillar davomida yozuv mashinkalarida ishlatilgan. Keyinchalik kompyuterlar paydo bo‘lgach, yozuv mashinkalaridagi klaviatura qanday bo‘lsa shundayligicha kompyuterga ko‘chirilgan. Shu yo‘sinda “kuchukcha” ham kompyuterga joylashib qolgan. 
Internet tarmog‘ining rus segmentida @ belgisi uchun “kuchukcha” atamasi paydo bo‘lishining eng mashhur versiyasiga keladigan bo‘lsak, quyidagi variant ko‘proq to‘g‘ri keladi. O‘sha vaqtlardagi juda mashhur bo‘lgan “Adventure” kompyuter o‘yinida it turli xil belgilardan yasalar edi. Kuchukning burni @ belgisi orqali ifodalangan. Ana shuning uchun rossiyaliklar bu belgini kuchukcha deb atashadi. Tabiiyki, biz ham ulardan namuna olgan holda uni shunday nomlaymiz. 

Bugungi kunda, @ belgisi elektron pochta manzillarini topishda ishlatiladi. Haqiqat shundaki, @ belgisi buxgalteriya sohasida ishlatilganda ham ma’lumotlar ajratuvchisi vazifasini bajargan. Aynan shu vazifa elektron pochta manzilini ajratishga ham xizmat qiladi. Kuchukcha belgisi elektron pochta nomini sayt nomidan ajratib turadi. Masalan, Akmal77@mail.ru, bu yerda “mail.ru” – elektron pochta xizmati, “Akmal77” – foydalanuvchining nomi.